Në fshatin Margegaj të Tropojës, varrezat e komunitetit ndodhen në një gjendje të turpshme dhe të braktisur, të mbuluara nga barërat e gjatë dhe mbeturinat.
Pamjet e fundit nga terreni tregojnë një situatë që ka shkaktuar indinjatë të thellë tek banorët, të cilët prej muajsh kërkojnë zgjidhje nga autoritetet lokale, por pa asnjë rezultat.
Pavarësisht kërkesave të përsëritura për ndërhyrje, Bashkia Bajram Curri, e drejtuar nga kryetari Rexh Byberi, nuk ka marrë asnjë masë konkrete. Reagimi i vetëm që kanë marrë qytetarët është se duhet “të rregullojnë vetë varrezat”, një qëndrim që ata e konsiderojnë si një fyerje ndaj dinjitetit të të ndjerëve dhe një shpërfillje ndaj përgjegjësive institucionale.
“Nuk po kërkojmë favore, por respekt për të vdekurit tanë,” shprehen banorët, të zhgënjyer nga heshtja e bashkisë. Ata theksojnë se varrezat nuk janë thjesht një vend, por një simbol i kujtimit dhe nderimit për të kaluarën dhe trajtimi i tyre nuk duhet të jetë kaq i mjerueshëm.
“Ju lutem publikojeni kete video pasi ne Margegaj te qyetit te Tropojes, varrezat jane ne gjendje te mjerueshme. Kryetari i Bashkise se Bajram Currit Rexh Byberi nuk ka mare asnje mase pasi jane bere ankesa dhe pergjigja qe kemi mare eshte veproni vete”, shkruan qytetari në denoncimin për JOQ, teksa publikon videon më poshtë:
Discussion about this post