Deputeti Petrit Vasili ka folur për aministinë fiskale duke e konsideruar një krim ndaj ekonomisë me urdhër të oligarkëve dhe trafikantëve. Ai ka renditur sipas tij arsyet pse nuk duhet të bëhet dhe se Rilindja duke iu referuar qeverisë Rama nuk pyet për FMN ngaqë do që të pastrojë me qindra miliona euro para të pista.
Në një reagim në Facebook, Vasili rendit argumentet e Fondit Monetar Ndërkombëtar kundër amnistisë fiskale.
“Amnistia fiskale e Ramës, krim ndaj ekonomisë me urdhër të oligarkëve e trafikantëve! FMN shumë e qartë dhe prerë kundër Amnistisë fiskale: “Ritheksojmë këshillën tonë kundër një amnistie të mundshme fiskale, pasi do të cenonte përmbushjen e detyrimeve tatimore. Duhen krijuar së pari sisteme efektive për të zbuluar evazionin fiskal dhe për të parandaluar mundësitë për pastrim parash dhe për korrupsion”.
Ai ka kritikuar Taulant Ballën duke e etiketuar si altoparlant pasi deputeti i Partisë Socialiste deklaroi se Amnistia fiskale do të bëhet duke thënë se nuk do pyesin për pjesën tjetër të parlamentit ngaqë i kanë votat.
Sipas Vasilit, realiteti është se Shqipëria rilindase vazhdon të jetë në listën gri për pastrimin e parave, është e dyta në botë për korrupsion, është e para në Europë për koncesionet shkatërrimtare për ekonominë, ka evazion fiskal të rëndë, bën tendera të shtrenjtë në çdo kohë.
Nënkryetari i LSI-së tha se Shqipëria rilindase vjedh 430 milionë euro me inceneratorët, rrëmben qindra miliona euro me rilindjen urbane dhe thekson se Amnistia është festa e Oligarkëve dhe trafikantëve të qeverisë Rama.
Ai e mbyll shkrimin duke thënë se rilindasit do bëjnë pazar me paratë e Inceneratorëve për miratimin e tij në Kuvend.
Discussion about this post