Vasili: Dhjetëra prokurorë dhe gjyqtarë në listën e “Aktivistit”

Nënkryetari i Partisë së Lirisë, Petrit Vasili ka reaguar pasi lista e aplikacionit “Aktivisti”, krijuar për punët e brendshme të PS, thuhet sa ka në përbërje të saj edhe punonjës të sistemit të Drejtësisë.

Vasili shkruan në Facebook se dhjetëra prokurorë e gjyqtarë janë pjesë e ‘Aktivistit’ duke e quajtur si dëshmi të kapjes së reformës në drejtësi nga qeveria.

Sipas Vasilit, kjo është arsyeja se përse SPAK nuk heton Ramën për skandalin “McGonigal”, aferën e inceneratorëve, pantronazhistët apo dhe Portin e Durrësit.

Deklarata:

Lista “Aktivisti” bën zero reformën në drejtësi, që kishte si kushtin numër një paanësinë dhe pavarësinë e plotë nga politika.

Por dhjetëra prokurorë dhe gjyqtarë pjesë e listës së “Aktivisti”-it janë dëshmi asgjësuese e kapjes së reformës në drejtësi nga Rama dhe Rilindja.

Të trashë dhe vulgarë në çdo veprim të tyre sot Rama dhe rilindasit, që çirren duke bërë be për kokën e reformës në drejtësi janë sot lakuriq përpara gjithë shqiptarëve duke provuar me fakte kapjen totale të drejtësisë.

Reforma në drejtësi e ka kthyer drejtësinë në një bisht të Rilindjes dhe në një legjitimuese të pandëshkueshmërisë së korrupsionit dhe të çdo veprimtarie mafioze të qeverisë.

Sot të gjithë e kuptojnë më së miri përse SPAK nuk fillon hetimet për Ramën dhe rolin e tij mafioz në aferën McGonigal.

Sot të gjithë kuptojnë përse nuk ndërpriten pagesat për inceneratorët dhe vaxhdojnë të vidhen miliona euro me groposjen e mbeturinave.

Sot të gjithë kuptojnë përse drejtësia nuk heton aferën miliarda euro të Portit të Durrësit.

Sot të gjithë e kuptojnë përse nuk thirret përpara drejtësisë Rama dhe Veliaj si përgjegjëgjes për aferën qindra milionshe të inceneratorëve.

Sot të gjithë e kuptojnë përse nuk hetohet për vjedhjen miliardere me energjinë elektrike.

Sot të gjithë e kuptojnë përse nuk hetohet për aferën e nxjerrjes nga qeveria të miliona të dhënave personale që ju dhanë patronazhistëve.

Sot të gjithë e kuptojnë përse nuk hetohet badërdia me fondet e rindërtimit, që u përdoren dhe përdoren edhe sot për të blerë vota.

Qindra milionë euro të taksapaguesve europianë dhe amerikanë, që paguan për reformën në drejtësi kanë shkuar krejtësisht dëm.

Drejtësia, gjoja e “re”, është shumë larg edhe drejtësisë, që lamë pas, se për ndonjë hap përpara as që bëhet fjalë fare.