Deputeti i PD, Ervin Salianji, ka zhvilluar sot nj takim në Korçë, ku në emër të PD ai i ka propozuar qytetarëve që së bashku më ta të ngrenë zërin për të ulur vlerën TVSH në 6%, sepse në këtë mënyrë do të rikthehet ulja e çmimit për bukën, perimet dhe karburantin.
Përmes një postimi në Facebook ai shprehet se këtë propozim PD do ta përcjellë në Kuvend në seancën e radhës. Ndër të tjera, ai tha se është e pafalshme që institucionet përgjegjëse heshtin.
“Çdo javë me qytetarët! Qytetarët janë të “ngopur” me debate politike dhe zhytur në pasiguri për atë që ky mandat i tretë i kësaj shumice ilegjitime po paralajmëron! Pa mbushur ende një muaj që kanë hyrë në zyra dhe shikoni çfarë po ndodh: çmimi i bukës i rritur me 20 lekë, çmimet e shportës vazhdojnë rriten, nafta, gazi dhe gjithçka tjetër po pësojnë rritje! Ata që kanë përgjegjësi heshtin! Isha sot në Korçë për të prezantuar tek qytetarët propozimin e PD për uljen e TVSH-së për produktet e shportës nga 20% në 6%.
Thënë më thjeshtë: vaj, sheqeri, miell, oriz, makarona, kripë, kos, qumësht, bukë dhe ujë, me çmime më të lira si pasojë e uljes së TVSH-së. Ky do të jetë propozimi që do mbrojmë më fortë në Kuvend sepse ky ndikon drejtëpërdrejtë në ekonomitë e familjeve tuaja!
Diferencën në politikë e bëjnë aktet! Koha do të tregojë më shume”, shkruan ai.
Kujtojmë se, pak javë më parë çmimi i bukës në vend u rrit me 10 lekë dhe pavarësisht se u konstatua se përgjegjëse për këtë janë kompanitë e prodhimit të miellit, Autoriteti i Konkurrencës nuk mori asnjë masë ndaj tyre.
Ndërsa ditën e sotme është raportuar dhe rritja e çmimit të karburantit, konkretisht vetëm gazi është dyfishuar në raport me çmimin në fillim të vitit.
