Banorët e fshatrave të njësisë administrative Bytyq të Bashkisë Tropojë, si dhe banorët e dy fshatrave të njësisë administrative Golaj në Has, kanë dalë këtë të hënë në protestë për gjendjen e rrugës prej 20 km që lidh këto zona.
Prej rreth 1 ore ata kanë bllokuar pikën dogane të Qafë Prushit, duke bllokuar rrugën kombëtare Krumë-Qaf Prush-Gjakovë. Të lodhur nga premtimet e shumta të bëra ndër vite nga qeveritë ata kanë dalë në protestë me pankarta në duar. Në disa prej tyre shkruhej “Pa rrugë, Bojkot Zgjedhjeve” “Sduam Pasaportë Evropiane, Por duam Rrugë”, “Premtime pafund, Gropa pafund”, ”Kini mëshirë pas 81 vitesh na shtroni të paktën 1 metër rrugë”.
“Nuk e kemi partiake, e kemi jetike, nuk po kërkojmë luks, po kërkojmë rrugë. Këtë vetëm rrugë nuk mund ta quajmë, është në gjendje kaotike. Asnjë cent nuk është investuar. Kemi të gjithë të drejtën e botës, jo vetëm të dalim në rrugë, por edhe të bllokojmë aksin. Nuk do ndalemi deri në plotësimin e kërkesave tona. Jemi mashtruar mjaftueshëm, nuk pranojmë më me premtime boshe elektorale”, u shpreh për mediat një prej banorëve.
Sipas 83-vjeçarit Muharrem Malaj nga fshati i Peraj i Hasit,rruga është ndërtuar që në kohën e Italise në vitin 1938 per shfrytëzimin e burimeve minerale të zonës. Banorët thonë se që nga viti 1938 kur është ndërtuar, kjo rrugë nuk ka pësuar asnjë riparim, pavarësisht premtimeve që janë dhënë gjatë 30 viteve të fundit.
Ata thanë se nuk do të dalin në votimet e 11 Majit për zgjedhjet parlamentare, nëse Qeveria nuk i merr në konsideratë kërkesën e vetme të tyre për ndërtimin e rrugës e premteuar që në vitin 2017 nga Mimi Kodheli që kandidonte për deputete për qarkun e Kukësit.
Discussion about this post