Qendra Kombëtare e Menaxhimit Kufitar, pranë Ministrisë së Punëve të Brendshme të Kosovës, bën të ditur se vazhdojnë të jenë të bllokuara tre pikë-kalimet kufitare me Serbinë: Jarinjë, Merdar dhe Bërnjak.
Ministria e Punëve të Jashtme bën të ditur se në territorin e Serbisë, në afërsi të pikave kufitare në Jarinjë dhe në Merdare, për shkak të protestave që po mbahen, nuk është i mundur kalimi i autobusëve dhe kamionëve që vijnë nga Kosova.
Protestuesit kanë bllokuar gjithashtu pikën kufitare në Bërnjak. Nuk është i sigurt për momentin as kalimi i makinave.
“Nëse keni hyrë tashmë në Serbi, atëherë ju lutemi t’i përdorni pikat kufitare ne Mutivodë, Dheu i Bardhë ose të merrni rrugë përmes Maqedonisë së Veriut (pikë-kalimi kufitar i Preshevës) përmes Shkupit.
Nëse nuk keni hyrë tashmë në Serbi, ju lutemi, mos udhëtoni përmes Serbisë”, thuhet në njoftim.
Pikat kufitare në Bërnjak, Jarinjë dhe Merdarë janë bllokuar nga dita e djeshme për shkak të protestave në Serbi.
Discussion about this post