Vazhdojnë të shtënat në veri të Kosovës/ Kurti: 30 serbë të armatosur rëndë po sulmojnë…

Të shtënat me armë po vazhdojnë ende të dëgjohen në veri të Kosovë

Në një video të siguruar nga Klan Kosova dëgjohen të shtëna të cilat dyshohet se janë të një kalibri të rëndë.

Kujtojmë se një polic ka mbetur i vrarë në orët e para të mëngjesit në veri të vendit, ku policia tha se janë sulmuar me armë dhe granata dore.

Ndërkohë kryeministri Albin Kurti ka mbajtur sot një konferencë për media lidhur me sulmet në Banjskë të Zveçanit, ku ka bërë të ditur se janë së paku 30 profesionistë të armatosur rëndë që po e sulmojnë Policinë e Kosovës.

Këtë sulm Kurti e cilësuar si të financuar dhe orkestruar nga Beogradi zyrtar, raporton Klan Kosova.

“Zyrtarët tanë policorë pasi që janë penguar në rrugë, janë sulmuar me armë të ndryshme përfshirë edhe me granata dore e me zolla. Sot është një ditë e rëndë për vendin tonë”, ka thënë Kurti.

“Sulmet e grupeve të armatosura po vazhdojnë akoma. Ne dënojmë këtë sulm terrorist. Krimi i financuar nga Beogradi zyrtar po e sulmon shtetin tonë. Ne mbrojmë dhe zbatojmë ligjshmërinë dhe Kosovën e pavarur”, ka shtuar Kurti.

Sipas tij, kriminelët dhe urdhërdhënësit e tyre do të kapen dhe do të ndëshkohen.

“Ne jemi në anën e drejtë, andaj në këtë rrugëtim jemi bashkë. I ftoj qytetarët që ta ruajë qetësinë dhe të tregojnë maturi duke lejuar institucionet ta kryejnë punën e tyre”, ka shtuar ai.

“Siç thash dhe më herë, sulmet mbi PK-në janë duke vazhduar, janë së paku 30 persona të armatosur rëndë, ushtarakë e policorë që ndodhen nën rrethimin e Policisë së Kosovës e të cilët i ftoj të dorëzohen te forcat tona”, ka thënë kryeministri Albin Kurti.