Familjarët e 12-vjeçarit Leo Sadiku, i cili humbi jetën në pediatrinë e QSUT-së, kanë kërkuar bërjen e autopsisë. Bëhet me dije se ka qenë vetë nëna e të miturit, që ka insistuar që të bëhet autopsia për të birin.
Familjarët kanë kërkuar nga Prokuroria e Tiranës të bëhet autopsia për të përcaktuar shkakun e vërtetë të vdekjes së të miturit, pasi kanë ngritur akuza për neglizhencë nga ana e mjekëve të spitalit.
Sipas gazetarit Osman Stafa, shkresa mban datën 3 shkurt, por që prej asaj date e deri më sot, (17 ditë) Prokuroria e Tiranës, nuk ka kryer asnjë veprim, për kryerjen sa më të shpejtë të proçedurave.
12-vjeçari, Leo Sadiku ndërroi jetë më 8 janar të këtij viti në Pediatrinë e QSUT-së. Ai fillimisht ishte shtruar në spitalin e Korçës me shenja të gripit më 28 dhjetor 2024 dhe la spitalin natën e Vitit të Ri. Gjendja e tij u përkeqësua dhe u rikthye në spital më 7 janar, me tension të lartë, glicemi të lartë, të vjella dhe temperaturë.
Mjekët e Korçës e dërguan në Pediatrinë e QSUT-së ku dhe ndërroi jetë. QSUT tha se shkak i vdekjes ishte miokarditi akut, një sëmundje e rrallë dhe e rrezikshme, e cila shoqërohet me shkallë të lartë vdekshmërie, ndërsa vetë familjarët e të miturit kanë ngritur akuza drejt mjekëve për neglizhencë.
Discussion about this post