Gjykata e Tiranës ka rrëzuar kërkesën e Bledar dhe Ina Spahiut, prindër të të miturit Brian Spahiu, i cili humbi jetën pas një ndërhyrjeje dentare.
Prindrit e 3-vjeçarit kërkuan që gjykata të detyronte prokurorinë të informonte familjen mbi ecurinë e hetimeve ndaj dentistes që kishte marrë përsipër trajtimin.
Çifti Spahiu kërkoi të njihej me veprimet hetimore të kryera deri më tani, por gjykata penale e refuzoi kërkesën me argumentin se familjarët e viktimës nuk janë bashkë-hetues në procedurat që zhvillon prokuroria.
Në padinë e paraqitur, familja ka kërkuar gjithashtu të marrë dijeni mbi rezultatet e akt-ekspertimit dhe të ketë mundësi të drejtojë pyetje ndaj ekspertëve. Deri tani, atyre u është komunikuar vetëm se ekspertiza është kryer nga një grup prej pesë mjekësh italianë, pa u bërë publik identiteti i tyre.
I kontaktuar nga Top Channel, avokati i familjes, Jordan Daci, deklaroi se prindërit kërkojnë transparencë të plotë dhe të drejtën për të bashkëpunuar me hetimin, përmes adresimit të pyetjeve ekspertëve të përfshirë.“Kërkojmë t’na jepen kopje të akteve qe nuk përbëjnë sekret, sepse nuk kemi përgjigje pse po zgjasin hetimet kaq gjatë dhe përse e kanë shmangur IML” tha ai.
Discussion about this post