33-vjeçarja nga Polonia, shtet që ka disa nga rregullat më të rrepta të abortit, vdiq nga sepsis, pasi spitali priti që fetusi të vdiste.
Autoritetet shëndetësore polake kanë caktuar një ekip për të nxjerrë udhëzime më të detajuara për ndërprerjen e shtatzënisë për institucionet mjekësore pasi një grua shtatzënë vdiq muajin e kaluar.
Autoritetet thanë të hënën se një gruaje 33-vjeçare, Dorota, i janë shkelur të drejtat pasi ajo vdiq nga sepsis në një spital.
Ajo ishte në muajin e pestë të shtatzënisë kur u shtrua në një spital në Poloninë jugore dhe vdiq më 24 maj, disa ditë pasi i kishte derdhur ujërat dhe disa orë pasi fetusi kishte vdekur, raportuan mediat polake.
Rasti ka vënë në qendër të vëmendjes ligjet strikte të Polonisë për abortin.
Autoritetet kanë këmbëngulur megjithatë se vdekja ka ndodhur për shkak të një gabimi mjekësor, duke specifikuar se aborti është i ligjshëm në rastet kur jeta ose shëndeti i një gruaje është në rrezik.
“Çdo grua, shëndeti apo jeta e së cilës është në rrezik në çdo kohë gjatë shtatzënisë, ka të drejtë ta ndërpresë atë”, tha ministri i shëndetësisë i Polonisë Adam Niedzielski pasi autoritetet nisën një hetim mbi rrethanat e vdekjes së Dorotës.
‘Dhunë me bazë gjinore’
Në një deklaratë, ministri i shëndetësisë Niedzielski tha se qeveria e përkufizon shëndetin e grave “gjerësisht” si shëndet fizik dhe mendor. Por organizata jofitimprurëse polake e planifikimit familjar Federa shkroi në një deklaratë të postuar në Facebook se ekipi i emëruar mund të minimizojë “kërcënimin e shëndetit mendor”.
Ata thanë se vendimi i pacientit duhet të jetë faktori “më i rëndësishëm” në ndërprerjen e shtatzënisë.
“Ne nuk duam të kompensojmë gabimet mjekësore, por t’i shmangim ato,” shtoi Federa.
“Çdo vdekje e një gruaje shtatzënë është më shumë se një vdekje”.
Irene Donadio, drejtuesja e lartë e strategjisë dhe partneritetit në Federatën Ndërkombëtare të Prindërimit të Planifikuar, tha në një deklaratë të dhënë për Euroneës Next se kufizimet polake të abortit po “vrasin gratë dhe dëmtojnë familjet”.
Ajo tha se mohimi i aksesit në abort është një formë e “dhunës me bazë gjinore”.
“Ky ligj ka pasoja reale mbi gratë, pasoja për jetën dhe vdekjen, dhe është përtej e pashpjegueshme se si partia në pushtet mund të vazhdojë të shkaktojë kaq shumë vuajtje të panevojshme”, shtohet në deklaratë.
Një protestë është planifikuar në Poloni më 14 qershor për rastin e Dorota-s.
Discussion about this post