Një ngjarje e rëndë është regjistruar mbrëmjen e kësaj të premte, rreth orës 22:20, ku 4 turistë, 2 burra dhe 2 gra, janë gjetur të vdekur, brenda një saune në hotelin me 5 yje “Gloria” në Qerret të Kavajës.
Mësohet se turistët që kanë humbur jetën janë: Nataliia Burenkova, 58 vjeçe, Sergei Burenkova, 60 vjeç, Nikita Belousov, 37 vjeç dhe Ekaterina Burenkova, 31 vjeçe, të afërm me njëri-tjetrin.
Si fillim, policia aludoi se turistët kanë qëndruar në sauna më shumë nga sa lejohet dhe janë asfiksuar, por nga hetimet paraprake dyshohet se viktimat ishin nën efektin e alkoolit çka ka sjellë më pas edhe humbjen e jetës së tyre.
Bëhet e ditur se tre nga viktimat kanë lidhje gjaku mes tyre, prindërit me vajzën dhe partneri i saj. Ata mbërritur në Shqipëri para një jave së bashku me një grup tjetër. Kanë qenë këto të fundit të cilët kanë vënë re mungesën prej një kohe të gjatë të shokëve të tyre dhe kanë ngritur alarmin. Më pas, kanë nisur kontrolli brenda hotelit, ku u gjetën të pajetë nga menaxheri, i cili më pas ka njoftuar ambulancën.
Lajmi i tragjedisë në Qerret u pasqyruan me shpejtësi edhe nga mediet ruse, ku shkruajnë se ngjarja në fjalë i është përcjellë edhe ambasadës ruse në Tiranë.
“Katër turistë të vdekur rusë u gjetën në një sauna hoteli në Shqipëri. Me sa duket, bashkatdhetarët vdiqën nga asfiksimi” shkruan një nga mediat ruse. “Autoritetet lokale njoftuan ambasadën ruse për incidentin” vijon më tej shkrimi.
Ndërkohë në polici janë shoqëruar stafi i hotelit si edhe personat që mund të kenë dijeni për tragjedinë që ka ndodhur në hotelin e Kavajës.
Recepsionisti i hotelit, ka qenë i pari që ka dhënë dëshminë e tij para grupit hetimor, ku u shpreh se ka qenë rreth orës 22:30 kur ai ka shkuar në zonën e saunës, ndërsa i ka thirrur atyre disa herë për t’i njoftuar se pijet dhe frutat iu kishin shkuar në dhomë.
“Iu thirra disa herë se pijet dhe frutat ishin gati. Pasi nuk mu përgjigj njeri hyra brenda në sauna dhe i pash të katërt, nuk mu përgjigjën. Njëri ishte i shtrirë në shezlong, dy në stol dhe një tjetër ulur me këmbët në pishinë. Ishin të asfiksuar”, kështu mësohet të jetë shprehur punonjësi i hotelit.
Niveli i temperaturës në sauna, si dhe kushtet e funksionimit të saj po hetohen gjithashtu nga grupi hetimor, ndërkohë që burime policore lokale bëjnë me dije se priten edhe ndalime për shkak të neglizhencës së personelit në kujdesin ndaj klientëve që frekuentojnë ambjentet e Spa-së, respektivisht saunës. Ky është dyshimi kryesor dhe pista kryesore ku është fokusuar grupi hetimor, por do të jetë ekspertiza mjeko-ligjore si dhe vlerësimi i kushteve termike dhe teknike brenda saunave ato që do të japin verdiktin përfundimtar.
