Kanë marrë një tjetër rrjedhë hetimet për ngjarjen e rëndë ku u gjetën të pajetë 4 turistët rusë. Burimet nga grupi hetimor bëjnë me dije se shkaku i vdekjes së tyre duket se është klori me të cilin u pastrua pishina. Ditën kur ngjarja ndodhi, është bërë dhe dezinfektimi i pishinës ku u gjetën të pajetë Natalia Burenkova, Sergei Burenkov, Ekaterina Burenkova dhe Nikita Belousov.
Policia ka marrë në pyetje punonjësen e hotelit, e cila ka pohuar se pishina dimërore kishte qenë e mbyllur dhe është hapur vetëm pas kërkesës së turistëve rusë. Mëngjesin e ditës së premte u bë dhe pastrimi i saj, për tu vendosur në dispozicion të tyre.
Hetuesit kanë dyshime se është përdorur sasi e madhe klori e cila ka shkaktuar asfiksinë e rusëve. Pas përgjigjes së ekspertizës mjeko-ligjore në ditët në vijim, do të lëshohen urdhër-arrestet për personat përgjegjës.
Pasi u bë marrja e kampionëve në trupat e viktimave, fillimisht u dyshua se shkaku i vdekjes ishte droga, bëhet me dije se në ambientet ku ata qëndronin nuk kishte lëndë narkotike, por vetëm disa shishe birre.
Vdekja misterioze e 4 turistëve në Qerret po hetohet edhe nga rusët
Policia shqiptare ka vendosur që për zbardhjen e vdekjes së katër rusëve mbrëmjen e së premtes, përveç hetuesve shqiptarë, gjatë hetimeve të jenë të pranishëm edhe ata rusë. Madje, grupi hetimor shqiptar mësohet të ketë bërë kërkesë që rusët të japin ndihmën e tyre dhe të jenë në kontakt me çdo veprim hetimor për zbardhjen e kësaj tragjedie.
Pas kësaj kërkese, oficerët e ambasadës ruse, që ndodhen në vendin tonë janë duke marrë informacion në kohë reale, por edhe ndihmuar hetuesit shqiptar. Gjatë gjithë ditës së djeshme është kryer ekspertiza mjeko-ligjore e katër trupave të pajetë pranë Mjekësisë Ligjore, me qëllim për të zbardhur çdo dyshim të mundshëm për këtë ngjarje kriminale.
Të pranishëm në këtë proces ishin edhe përfaqësues të ambasadës ruse në Tiranë. Tashmë pritet që këtë të hënë mjekësia ligjore të dalë me një përgjigje zyrtare për shkakun që solli vdekjen e 4 pjesëtarëve të familjes ruse dhe të shuajë të gjithë dyshimet e hetuesve. Ndërkohë që në laborator janë dërguar edhe disa mostra të pishinës dhe SPA-së, ku do kryhen edhe analizat bakteriologjike, të ambienteve të hotelit dhe ujit të pishinës dimërore.
Dy bashkëshortët Natalia dhe Sergei Burenkova, 58 dhe 60 vjeç, vajza e tyre Ekaterina, si dhe partneri i saj Nikita u gjetën të pajetë në pishinën dimërore të hotelit.
Viktimat ishin pjesë e një grupi turistësh që kishin ardhur në vendin tonë prej një jave me pushime në zonën e plazhit të Qerretit në Kavajë.
Ditën e ngjarjes ata kishin vizituar qytetin turistik të Ohrit në Maqedoni e Veriut dhe ishin kthyer rreth orës 20:00 në hotelin ku ishin vendosur në Qerret, ku edhe humbën jetën tragjikisht.
