Kleriku Fetullah Gulen ndërroi jetë por mesa duket presidentit Rexhep Tayyip Erogan i ka ngelur peng që nuk e ekstradoi dot në Turqi.
Megjithatë kreu i shtetit turk shprehu bindjen se drejtësinë që nuk e dhanë dot autoritetet, do ia japë Zoti. Në reagimin e parë, pas vdekjes për atë që dikur e kishte bashkudhëtar, Erdogan nuk i përmendi emrin, por garantoi se do të zhdukë rrënjët e organizatës FETO.
“Tradhtarët pavarësisht të gjitha përpjekjeve tona ia dolën që t’i shpëtonin drejtësisë sonë, ikën nga kjo botë pa dhënë llogari për gjakun e dëshmorëve dhe për atë që u bënë fëmijëve të këtij vendi, por nuk do të shpëtojnë dot nga drejtësia e Zotit. Jemi të bindur se Zoti do u kërkojë llogari në botën tjetër për gjithçka i kanë bërë vendit tonë, ndërsa ne nuk do të ndalim luftën tonë për të zhdukur çdo rrënjë të grupit FETO”, tha Erdogan.
Fetullah Gulen ndërroi jetë të dielën në moshën 83-vjeçare në Pensilvani ku jetonte që prej vitit 1999. Autoritetet turke e kanë bërë atë përgjegjës për grushtin e dështuar të shtetit të 15 Korrikut të vitit 2016 ku humbën jetën 251 persona. Vetë Gulen, në atë kohë, i mohoi akuzat.
Discussion about this post