Tre punonjësit e policisë së Kavajës që u arrestuan për ngjarjen e rëndë të 2 ditëve më parë kur në komisariat u gjet u vdekur në ambientet e paraburgimit, 31-vjeçari Ilvi Meta, do të dalin nesër para gjykatës për të mësuar masën e sigurisë.
Prokuroria ka kërkuar burg për të tre. Bexhet Berberi, inspektor, polic roje; Rushit Kola, inspektor, polic roje; Petrit Brahimaj, nënkomisar, akuzohen se kanë shpërdoruar detyrën.
31-vjeçari po mbahej në paraburgim me akuzën e vjedhjes dhe sipas policisë, i ka dhënë fund jetës duke përdorur lidhësen e kapuçit.
Nga hetimet e para, dyshohet se Meta ka përdorur hekurat në dhomën e sigurisë për të varur veten. Avokatja e Popullit thotë se vendosja e hekurave horizontalë mbi lartësinë 60 cm nuk lejohet në bazë të rregullores.
Ngjarja e rëndë ka ndodhur mbrëmjen e së mërkurës në Komisariatin e Kavajës. Familjarët janë shprehur se Ilvi nuk është vetëvarur ashtu siç është deklaruar zyrtarisht, por është vrarë nga policia.
Discussion about this post