Vdekja e Laer Kurtit/ Genc Sejko: E vrau indeferenca e shtetit ndaj jetës së njerëzve të thjeshtë

I njohur si njeriu i memeve, Genc Sejko ka hedhur dyshime mbi transparencën e autoriteteve në lidhje me vdekjen e 32-vjeçarit Lear Kurti. Në një postim në Facebook, Sejko ngre tre pyetje për të zbuluar më shumë rreth asaj që deri më tani nuk është shumë e qartë pavarësisht reagimeve të njëpasnjëshme të Autoritetit të Mbikqyrjes Policore, të Policisë së Shtetit dhe të Prokurorisë së Tiranës. Sejko kërkon të dijë:

1. Me ç’arsye u ndalua Lear Kurti nga policia?
2. Nëse ka qenë i dyshuar për mbajtje të lëndëve narkotike si mundet që ja kanë lënë atë në posedim për ta gëlltitur më vonë.
3. Për sa orë është lënë pa ndihmë mjekësore deri sa ka dhënë shpirt në qelitë e komisariatit nr3? Dhe për ta zbardhur këtë mjaftojnë pamjet e kamerave të brendshme të komisariatit.

Në fund të postimit, ai shkruan se Kurtin nuk e ka vrarë policia, por papërgjegjshmëria, injorimi dhe tallja me jetën e njerëzve pa mbështetje.

Postimi:

Lear Kurti vdiq ndërkohë që ishte i shoqëruar nga policia e shtetit. Nuk vdiq duke i kundërshtuar, por u la në mëshirën e fatit ndërkohë që kishte nevojë për ndihmë mjekësore. Për ata që ndërkohë nuk kanë ende një variant zyrtar dhe enden në zyrat e propagandës në përpjekje për të manipuluar të vërtetën kam disa pyetje:

1. Me ç’arsye u ndalua Lear Kurti nga policia?
2. Nëse ka qenë i dyshuar për mbajtje të lëndëve narkotike si mundet që ja kanë lënë atë në posedim për ta gëlltitur më vonë.
3. Për sa orë është lënë pa ndihmë mjekësore deri sa ka dhënë shpirt në qelitë e komisariatit nr3? Dhe për ta zbardhur këtë mjaftojnë pamjet e kamerave të brendshme të komisariatit. Por deri më tani në vend të sqarojë opinionin publik, propaganda veç ka gërryer në të kaluarën e viktimës për të relativizuar vdekjen dhe për ta njollosur atë. Sepse e vërteta është vrastarja më e madhe e regjimeve ku jeta e njeriut nuk ka asnjë vlerë. Siç ka ndodhur dhe më parë, në vendin ku mbizotëron padrejtësia dhe propaganda, të vërtetat e thëna troç nxisin revoltë dhe protestë. Sa më shumë të vonohet publikimi i variantit zyrtar të vdekjes aq më e madhe dhe e trashë do jetë doza e manipulimit të së vërtetës. Shkurt dhe qartë: nuk e vrau policia, e vrau papërgjegjshmëria. E vrau injorimi dhe tallja me jetën e njerëzve pa mbështetje. Për të cilët nuk flet askush deri ditën kur dhe vdekja u njolloset për pak pushtet dhe ca klikime.

Lear Kurti humbi jetën pasi u shoqërua nga efektivët në komisariatin nr.3. Policia tha se 32-vjeçari u ndje keq dhe u dërgua në spital ku humbi jetën, ndërsa në deklaratën e Traumës thuhet se Kurti ka shkuar në spital i vdekur. Pas ekspertizës mjeko-ligjore, Prokuroria dhe AMP kanë deklaruar se brenda në stomak kishte një qese plastike që mendohet se kishte brenda lëndë narkotike. Në trupin e viktimës nuk kishte shenja dhune. Por për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.