Ish-kryeministri Sali Berisha ka njoftuar protestë të fuqishme para ministrisë së Brendshme në lidhje me vdekjen e të riut Lear Kurti në rrethana misterioze pas shoqërimit në komisariat.
Berisha shkruan se i riu vdiq në duart e policëve “banditë të droguar të Ramës dhe Çuçit” ndërsa shton se ai u vra për së dyti nga ish drejtori i Policisë, Ardi Veliu, nisur rezultati i raportit mjeko-ligjor se Kurti ndërroi jetë pasi kishte qese me kokainë në stomak.
“Sot, në ora 18:00, protestë e fuqishme për vdekjen me dhunë të të riut, Lear Kurtit nga policë banditë të droguar të Ramës-Çuçit, dhe vrasjen e tij për së dyti nga krimineli i tyre me uniformë, Ardi Veliu”, ka shkruar Berisha.
Kujtojmë se 32-vjeçari u ndalua në orën 23:07 të mbrëmjes së 19 tetorit nga efektivët, në rrugën “Riza Çuka” në Laprakë, por nuk iu bind urdhit të uniformave blu dhe ka vrapuar. Siç sqarohet në njoftimin e policisë, i riu është kapur pas ndjekje, është dërguar në komisariat, ku ka shfaqur problemet e para shëndetësore. Fillimisht u aludua se i riu vuante nga epilepsia, më pas në deklaratën zyrtare u tha se i riu kishte gëlltitur një qese me lëndë narkotike.
Kontradikta është në faktin që efektivët pretendojnë se ka ndërruar jetë në spital, ndërsa bluzat e bardha të Traumës thonë se Kurti ka mbërritur pa shenja jete në duart e tyre. Paraprakisht, nga hetimet e deri më tanishme, është deklaruar se në trupin e viktimës nuk kishte shenja dhune. Por për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.
Discussion about this post