Një fëmijë 9-vjeçar me origjinë shqiptare humbi jetën pasi ra në kontakt me rrymën elektrike në kondicionerin e një hoteli, në Zakynthos të Greqisë.
Sipas raportimeve nga mediat greke, ai ka qenë duke luajtur me shokët në momentin që ishte fshehur pranë kondicionerit i cili ndodhej shumë pranë tokës. Për fat të keq, 9-vjeçari ka rënë në kontakt me rrymën elektrike që i mori jetën në vend. Fëmija fatkeq u transportua në Spitalin e Zakynthos, pa puls ku mjekët nuk kanë mundur të bënin asgjë, përcjell Gijotina.com.
Prindërit e 9-vjeçarit nuk janë ende në gjendje të kuptojnë ngjarjen tragjike, si dhe thonë se do ta ndjekin ngjarjen në rrugë ligjore.
“ Nuk kam fjalë …Babai i shokut të tij, njëkohësisht fqinji ma solli të vdekur. Ai vdiq menjëherë, nuk u dëgjua asnjë zë. Fëmijët tanë po luanin fshehurazi dhe imi ishte fshehur pas disa instalimeve të pambrojtura të ajrit të kondicionuar të një hoteli”- ka thënë babai i viktimës.
“Shokët e tij panë që fëmija im ishte pa ndjenja dhe njëri prej fëmijëve vrapoi dhe menjëherë i tha babait të tij dhe ai më pas e mori dhe ma solli tek unë nga frika. Fëmijë të tjerë mund të ishin fshehur në atë pikë dhe ne tani po vajtonim shpirtra të tjerë të pafajshëm. Unë do ta ndjek në rrugë ligjore”, shtoi ai.
Për vdekjen e të miturit janë bërë tre arrestime nga Departamenti i Policisë së Zakynthos, të cilët janë pronari i hotelit, elektriçisti dhe ftohësi i kompanisë.
