Ndonëse disa drejtorë të kryebashkiakut Erion Veliaj ndodhen në burg, këta të tjerët vazhdojnë pa frikë të bëjnë namin me tenderët. Herion Rrapaj është një nga ata që Veliaj e lëviz sa në një drejtori në tjetrën, sepse ky firmos pa problem çdo tender.
Rrapaj këtë herë do të blejë asfaltin e zgjedhjeve dhe për këtë do të shpenzojë 350 milionë lekë nga taksat që paguajnë qytetarët e Tiranës. Nëse llogarisim edhe TVSH, vlera e pritshme e kontratës është afërsisht 420 milionë lekë.
Dhe pas kësaj do të shfaqet Lali Eri që do të shkelë në rrugicat e asfaltuara si gjithmonë, para zgjedhjeve. Bëhet fjalë për tenderin me numër reference REF-16981-08-26-2024, objekt ‘Blerje Bitumi”, gara për të cilin është hapur më datë 26 gusht 2024.
Dhe, pa zgjatur vetëm një ditë, më 27 gusht 2024 është mbyllur afati për dorëzimin e ofertave dhe është mbajtur tenderi. Më pas më 28 gusht është bërë publik edhe emri i fituesit.
E qartë që në këtë tender çdo gjë ka qenë e përcaktuar më herët dhe gara është hapur fiktivisht, sa për të mbuluar abuzimin që bëhet. E thënë shkurt, tenderi i ishte premtuar firmës “TRIOS” sh.a, pasi fillimisht përballë saj ka qenë firma “RESULI-ER” sh.a. Dhe siç shihet edhe në dokumente kemi të bëjmë me një procedurë me negocim.
Ne shpesh herë kujtojmë se kryeministri Edi Rama ka paralajmëruar që do të merren masa ndëshkuese ndaj atyre që zhvillojnë tenderë me negocim, teksa i bënte thirrje AP të mos kalonte ne sistem kontrata të tilla. Por me sa duket kjo nuk vlen për drejtorët e Lali Erit.
Rrapaj e ka zhvilluar këtë procedurë me negocim.
Open Data Albania i ka vendosur “Flamurin e kuq” për shkeljen e ligjit mbi prokurimet, Kjo është shenja e riskut të korrupsionit. Ndërsa Agjencia e Prokurimeve Publike e ka regjistruar kontratën në sistem, pa marrë asnjë masë si institucion përgjegjës. Aq formale është puna e agjencisë, sa që publikon fituesin e tenderit më 28 gusht dhe në faqen zyrtare rezulton sikur ka ndodhur më 28 shtator 2024.
Ne po e denoncojmë këtë tender si media, ndërsa duhet theksuar se është edhe më shqetësues fakti që vetë institucionet shkelin fjalën e thënë nga shefi i tyre dhe ligjin e shkruar.
Firma fituese “TRIOS” sh.a, ka një marrëdhënie yë fortë me vetë shefin e bashkisë Tiranë, Erion Veliaj, i cili ka dhënë aprovimin e tij për këtë tender.
Dhe kjo nuk është hera e parë që kompania ka përfituar tenderë abuzivë nga favorizimet që i bëjnë zyrtarët e Bashkisë Tiranë.
Sipas të dhënave të evidentuara në portalin Spendig Data rezulton se vetëm në katër vitet e fundit “TRIOS” sh.a, me pronar Klodjan Sulën, ka përfituar 3.2 milionë euro nga Thesari i Shtetit. Të gjithë tenderët i janë dhënë nga Bashkia Tiranë, kryesisht për blerje bitumi.
Se ku e çon Lali Eri gjithë këtë bitum ne nuk e dimë. Shpresojmë të mbushë ndonjë gropë nëpër rrugë para zgjedhjeve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post