Arjan Baçi është emëruar administrator i inceneratorit të Tiranës. Vendimi është marrë nga GJKKO. Baçi tha se nga ajo që është kontatuar është se Bashkitë e qarkut të Tiranës janë debitorë ndaj kompanisë.
“Gjykata ka vendosur që për menaxhimin e kësaj kompania, të merret Agjencia e Administrimit të Pasurive të Sekuestruara dhe Konfiskuara dhe administrator jam zgjedhur unë. Puna vazhdon normalisht, po ndiqen të gjithë kontratat. Problematikë që pamë është se bashkitë e qarkut të Tiranës janë ende debitorë në shoqëri. Po bëhet muaji i tretë që nuk kanë shlyer detyrimet. I kemi dërguar shkresat për ti vënë para përgjegjësisë për ti kërkuar zbatimin e ligjit. Mos zbatimi do të sillte kaos në mbledhjen e mbetjeve”, tha Baçi.
Sipas tij, debitorë janë Bashkia e Tiranës, Kavajës e Vorës.
“Bashkitë duhet të shlyejnë detyrimet bazuar në kontratën që kanë firmosur, në mënyrë që të vijohet të depozitohen mbetjet dhe të vijojë procesi”, tha Baçi. Sipas tij, kontrata duhet zbatuar sepse duhet shmangur kaosi që mund të krijohet në këto bashki me mbetet.
Në vijim të deklaratës së tij, administratori i inceneratorit të sekuestruar të Tiranës tha se do të shikojë mënyrën se si janë lidhur kontratat dhe më pas do të mund të krijojë një panoramë më të gjerë rreth asaj që ka ndodhur.
Baçi pohoi se puna do të vazhdojë normalisht duke zbatuar kontratat e lidhura mes inceneratorit dhe Bashkive të Qarkut Tiranë.
Inceneratori i Tiranës u sekuestrua me kërkesë të SPAK, ndërsa vendimi u morr disa ditë më parë nga Gjykata Kundër Korrupsionit dhe Krimit të Organizuar.
Discussion about this post