Kryetari i Bashkisë së Tiranës, Erion Veliaj dhe ajo e Durrësit, Emirjana Sako, i kanë bërë një dhuratë të çmuar me vlerë 250 mijë euro, Klodian Zotos, pikërisht në ditën e të dashuruarve.
Të dhënat e Thesarit të Shtetit tregojnë se Veliaj dhe Sako kanë paguar bashkërisht mbi 30 milionë lekë në 14 shkurt 2023, në favor të kompanisë koncesionare “Integrated Energy BV”, për depozitimin dhe incenerimin e mbetjeve urbane në landfillin e Sharrës.
Por, siç ka konstatuar Kontrolli i Lartë i Shtetit dhe siç provoi edhe një investigim i kryer nga Partia e Lirisë, kompania koncesionare nuk kryen procesin e incenerimit të mbetjeve urbane, duke rritur në mënyrë të ndjeshme kostot për institucionet publike, të cilat nuk marrin shërbimin e paguar.
Bashkia e Durrësit ka paguar më 14 shkurt faturën prej rreth 22 milionë lekë në llogaritë e koncesionarit IEBV. Ndërsa Bashkia e Tiranës ka lëvruar në favor të kompanisë së Zotos rreth 8 milionë lekë.
Shoqëria koncesionare e landfillit të Sharrës është krijuar në vitin 2016 dhe rol kryesor kishte Klodian Zoto. Ky i fundit është në kërkim prej më shumë se një viti, i konsideruar si një prej organizatorëve kryesorë të skemës mashtruese të inceneratorëve.
Së fundmi, Struktura e Posaçme Anti-Korrupsion, SPAK, e dërgoi Zoton për gjykim, së bashku me shumë persona të tjerë, me akuzën e korrupsionit dhe pastrimit të parave në procedurat tenderuese dhe zbatimin e kontratave koncesionare për inceneratorët e Elbasanit dhe të Fierit. Ndërkohë, SPAK nuk ka dhënë asnjë sinjal publik për hetimin e procedurave të inceneratorit të Tiranës.
Discussion about this post