Tensione edhe gjatë protestës së katërt para bashkisë së Tiranës për dorëheqjen e Erion Veliajt. Me pankarta, thirrje dhe fjalime nga mikrofoni i protestës, protestuesit u grumbulluan para bashkisë dhe kërkuan dorëheqjen e kryebashkiakut dhe arrestimin e tij.
Adriana Kalaja nga PD bëri me dije se kjo e sotmja pritej të jetë një protestë maratonë. Duke folur për gazetarët, ajo tha se në policinë e Tiranës është marrë leje për të protestuar deri në 8 të darkës, ndërsa shtoi se protesta mund të zgjasë edhe më shumë. Megjithatë, protesta zgjati rreth 2 orë.
Edhe këtë të premte, protestuesit kanë hedhur molotov pranë derës kryesore të fortifikuar të Bashkisë së Tiranës. Nga pamjet shihen efektivët e policisë që pas hedhjes së molotovit ndërhyjnë me mjete zjarrfikëse për të shuar flakët. Gjatë fjalimeve të mbajtur nga mikrofoni i protestës, është dënuar dhe reagimi i ambasadave “kundër dhunës” në tubimin e një jave më parë.
Nuk munguan as goditjet me mollë, vezë e portokalle drejt fasadës së bashkisë.
Momenti tensioni ka pasur mes këshilltarëve të opozitës në bashki dhe protestuesve nga njëra anë me efektivët e policisë në anën tjetër, teksa policia ndaloi përpjekjen e të parëve për tu futur brenda ambienteve të bashkisë.
Protestat te bashkia nisën pas arrestimeve të drejtorëve të Veliajt lidhur me aferën “5D”. Gjatë fjalimeve nga mikrofoni i protestave, qytetarë dhe anëtarë të opozitës e kanë cilësuar Veliajn “kokën e bandës së drejtorëve hajdutë” dhe “pronarin faktik të inceneratorit të Tiranës”.
Vetë kryebashkiaku i ka mohuar këto akuza duke pretenduar se nuk ka pasur dijeni për aferat.
Prokuroria e Posaçme, deri më tani, nuk ka ngritur akuzë penale ndaj Veliajt as për rastin “5D” ashtu dhe procedimin për inceneratorin e Tiranës.
Opozita dhe mediat ndërkohë, vijon të publikojnë denoncime dhe të dhëna për të tjera afera në bashkinë më të madhe të vendit.
Discussion about this post