Me zyrtarizimin e festave të fundvitit, bashkitë në vendin tonë “bëjnë një sy qorr” për familjet që po jetojnë me të ardhura minimale, por nga ana tjetër gjejnë kohë të thurin plane se si të mbushin xhepat me tendera, duke blerë fishekzjarrë drita dhe mjete të tjera dekorative.
Po ashtu në një kohë ku vendi po përballet me krizë ekonomie, bashkitë kanë rritur detyrimet e prapambetura gjatë këtij viti duke u justifikuar se nuk kanë të ardhura t’i shlyejnë ato. Sipas raportimit nga gijotina.com shumë prej tyre nuk kanë bërë as investimet që kishin planifikuar për shkak se nuk kanë fonde, por kur vjen fjala për tenderë dhe shpenzime abuzive paratë derdhen nga thesi.
Bashkia e Tiranës do të shpenzojë 2,915,425 (dy milion e nëntëqind e pesëmbëdhjetë mijë e katërqind e njëzet e pesë) lekë pa TVSH dhe këtë vërteton Agjencia e Prokurimeve.
Në kontratën e publikuar në këtë institucion për këtë javë rezulton se kjo shumë parash do të shpenzohet nga buxheti i shtetit, 10 ditë para festave të fundvitit.
Për të shmangur shpenzimet nga taksat e kryeqytetasve, fishekzjarrët mund të dhuroheshin edhe nga kompanitë private të cilat operojnë në bashkëpunim me “qejfliun” Erion Veliaj, por ky i fundit zgjedh rrugën më të lehtë atë që prej kohësh e ka kthyer në zakon shpenzimin pa kriter të fondeve nga buxheti i shtetit.
Teksa shuma prej 3 milion lekësh mund t’u shkonte në ndihmë dhjetëra banorëve të braktisur që enden rrugëve të kryeqytetit me shpresën e një vendstrehimi për vitin që vjen. Po ashtu shuma e planifikuar për fishekzjarrët, mund t’u dhurohej qendrave sociale që nuk kanë mundësinë të shijojnë panoramën e fishekzjarrëve në natën e ndërrimit të viteve.
Megjithatë, kur vjen puna tek shërbimi i këtyre të fundit, Veliaj zgjedh gjithmonë t’i surprizojë bashkë me shërbyesit e propagandës nga mbrapa, duke menduar se u ka hedhur “hi syve” gjithë shqiptarëve me “kontributin” e tij. A.L / gijotina.com.
Discussion about this post