Administratorët e ECO Tirana nuk pyesin për ligjin mbi prokurimet, por kryejnë vetëm porositë e kryetarit të Bashkisë Tiranë, Erion Veliaj. Dhe tani që emri i Lali Erit është në dosjet që po shqyrtohen nga SPAK, në këtë shoqëri nxitojnë të harxhojnë çdo lek që kanë në buxhetin e këtij viti.
Këtë herë “ECO Tirana” ka në plan pazare të tjera që nuk kushtojnë pak. Në këtë kuadër është hapur tenderi me objekt “Blerje vajra minerale dhe graso për motorë dhe komponentë mekanik, antifrize”. Prokurimi është shpallur më 22 maj 2024 dhe i janë vënë në dispozicion 129 milionë lekë. Deri më 12 qershor 2024, kur ka qenë afati i fundit i garës, kanë dorëzuar oferta 5 kompani.
Nga këto, ”B & A-02” me vlerë 99 milionë lekë dhe kompania EXIMOIL me vlerë 89 milionë lekë kanë dorëzuar ofertat më të lira. Propozimet e tyre ekonomike nuk janë marrë në konsideratë, sepse “Eco Tirana” i ka skualifikuar nga gara me justifikime të ndryshme. Argumentet lidhen me dorëzimin e mostrave për mallrat që do lëvrohen, apo mungesën e bilancit financiar të vitit 2023. Menjëherë pas tyre janë përjashtuar nga gara edhe dy firmat e tjera, ndërsa kompania TOP-OIL e Luan Saraçit me ofertë të shtrenjtë me vlerë 124 milionë lekë u kualifikua për të marrë kontratën.
Por, çështja është se mbeti e vetme dhe pa konkurrent përballë në këtë fazë. Nën frymën e ligjit mbi prokurimet, për të marrë oferta më të përshtatshme, procedura duhej anuluar.
Për një moment supozojmë se të gjitha argumentet e skualifikimit të kompanive të tjera qëndrojnë. Por kriteret e përdorura duhet të jenë të njëjta edhe për fituesin. Për shembull kompania 4.EXIMOIL, është skualifikuar për arsye se: Nuk ka paraqitur Akt Ekspertizën e Ekspertit Kontabël të Autorizuar dhe bilancet e vitit 2023.
Nga kontrolli në QKB, del se kompania fituese nuk ka depozituar deri më sot bilancin financiar të vitit 2023. Dokumenti i mëposhtëm tregon këtë mungesë të TOP-OIL.
Marrim një kriter tjetër, “Licencë të kategorisë IV/A”, e cila u është evidentuar si mungesë kompanive të skualifikuara. Në dokumentin e marrë sot nga QKB, nuk ekziston të jetë aktive kjo lloj licence për llogari të TOP-OIL.
Por, si në gjithë bashkinë Tiranë mbizotëron fryma e Lali Erit e shpërdorimit të parave të buxhetit të shtetit. Prandaj edhe procedurat për këtë tender kanë vazhduar në kushtet e manipulimit dhe kontrata i është bërë dhuratë firmës TOP-OIL.
Sigurisht me këtë aferë, “Eco Tirana” shtoi edhe një tjetër ‘Flamur të Kuq’ në listë, pasi Open Data Albania vlerëson që ka risk për fondin nga korrupsioni.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post