Bashkia e Tiranës është kthyer në “ishullin e thesarit” për gazetarinë fact-checking sepse prej disa muajsh vetëm Gijotina.com e vetme ka denoncuar për publikun shkelje të panumërta tek procedurat e prokurimit publik të konfirmuara nga Open Data Albania ku rasti i fundit lidhet me rehabilitimin e emergjencës civile të Urës së Çekrezit me fond limit 343 milionë lekë të vjetra pa TVSH.
Çfarë ka ndodhur dhe pse paraqet shqetësim të rëndë për fondet publike ky rast?
Sipas kontratës së firmosur më 29 prill 2022, fitues janë shpallur kompanitë “Aurum Construction” shpk dhe “Egland” shpk, të cilat janë në bashkëpunim, për vlerën 380 milionë lekë të vjetra me TVSH.
Në tender kanë marrë pjesë 10 kompani nga të cilat 8 janë skualifikuar për arsye nga më të ndryshmet ku bie në sy fakti se të gjitha këto kompani kanë ofruar kosto më të ulët për ndërtimin e Urës së Çekrezit. Ndërkohë kompania që nuk është skualifikuar “Deniz 05” shpk ka pasur ofertën më të lartë se “Aurum Construction” shpk dhe “Egland” shpk, duke u përzgjedhur këto të fundit fituese.
Por, veç faktit dyshues për skualifikimin e kompanive me oferta të ulëta, rezulton se ortaku i njërës prej kompanive fituese është Terens Lamaj, inspektor i Inspektoratit Kombëtar të Mbrojtjes së Territorit (IKMT), duke nxjerrë në pah faktin se fondet publike qarkullojnë brenda administratës publike dhe konkurrenca është një mit që u shitet sipërmarrësve të rinj në Shqipëri.Kjo nuk është shkelje e ligjit, por fakti se 8 konkurrentë janë skualifikuar dhe njëri nga aksionerët kryesorë të kompanisë fituese punon si inspektor te IKMT-ja janë sinjale shqetësuese për menaxhimin e fondeve publike, si bëhet përzgjedhja dhe se sa reale është konkurrenca.
Discussion about this post