Kryetarit të Bashkisë Tiranë, Erion Veliaj, nuk i ndahet shpirti nga aferat me oligarkun Shefqet Kastrati. Çdo herë që bëhet fjala për blerje karburantesh nga bashkia apo institucionet vartëse, fituesi dihet pa u shpallur tenderi.
Kastrati meqenëse është dominues i tregut të naftës nuk ngurron të zhvatë edhe tenderët me vlerë të vogël. Edhe këtë herë ai e ka nisur shtatorin me 100 milionë lekë dhuratë nga Veliaj. Më datë 1 shtator 2023 është firmosur kontrata për tenderin me objekt “Blerje benzinë Premium Unl 10ppm”, e hapur nga Drejtoria e Përgjithshme e Rrugëve dhe Ndriçimit Publik Tiranë, në varësi të Bashkisë Tiranë.
Siç ndodh rëndom me këto prokurime për karburant, Kastrati ka qenë e vetmja kompani që ka paraqitur ofertën në fillim të gushtit dhe pas një muaji Veliaj menjëherë firmosi marrëveshjen.
Sigurisht në mungesë konkurrence u shpall fituese oferta e vetme me vlerë sa 98% e fondit limit. Për këto shkelje, procedura mbart risk të lartë korrupsioni, prandaj Open Data Albania e ka futur në zonën e kuqe këtë prokurim, duke ia shtuar listës me dhjetëra tenderë të negociuar mes Kastratit dhe Veliajt.
Kontrata me Kastratin mbetet e hapur
Ndërkohë, vëmë re se për këtë kontratë nuk është përcaktuar një afat përfundimi. “Nga lidhja e kontratës/ kontratave deri në plotësimin e nevojave të autoritetit kontraktor sipas kërkesës, në bazë të marrëveshjes kuadër”, thuhet në dokumentet e tenderit. Çka do të thotë se kjo vlerë prej 96 milionë lekësh do të rritet në vazhdim sepse Veliaj do të blejë sërish karburant në muajt në vazhdim.
Në dokumentet standarde të tenderit thuhet se nga vlera e vënë në dispozicion 33 milionë lekë do të shpenzohen për të blerë benzinë në këto 3 muajt e këtij viti. Ndërsa pjesa tjetër 63 milionë lekë do të shpenzohet për benzinë në fillim të vitit 2024.
Kastrati merr thuajse gjithë buxhetin e shtetit që prokurohet për blerje karburantesh. Kujtojmë se në 31 mars 2023, Kastrati mori super tenderin me 7 lote, 4.5 miliardë lekë për blerje nafte nga Agjencia e Prokurimeve të Përqendruara në varësi të Ministrisë së Brendshme.
Lexo edhe: Pasuesi i Safet Gjicit në Kukës nën hetim se i dha Kastratit 210 MLN lekë pa garë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post