Erion Veliaj i merr paratë e buxhetit të vitit 2026 të Bashkisë Tiranë dhe i përdor për projektet elektorale para zgjedhjeve të vitit 2025. Kjo është ajo që duket dhe justifikohet politikisht, sepse vendimmarrja në këshillin bashkiak varet nga vetëm nga votat e PS-së. Me këtë logjikë është pranuar financimi i ‘Rehabilitimi i infrastrukturës rrugore në njësinë Administrative nr.5 + 13+ Farkë’. Ndërsa fati i fondit limit prej 2.4 milionë eurosh varet vetëm nga Lali Eri. Dhe kryetari e ka paracaktuar se kujt do t’i shkojnë paratë qysh në nisje të tenderit.
Në këtë projekt bëhet fjalë për shtrimin e disa rrugicave në Farkë dhe zonën afër saj. Sikur shihet nga fotot, një pjesë e rrugicave janë fare të amortizuara, ndërsa të tjerat që janë në Farkë, janë shtruar më parë, por është bërë punë shkel e shko, pasi gjatë dimrit janë të rrëshqitshme për automjetet.
Ajo që ka rëndësi elektorale është që nga këto 2.4 milionë euro një pjesë e këtyre rrugicave të shtrohet me asfalt, diferenca ushqen korrupsionin.
Prandaj ky tender nuk është zhvilluar sipas rregullave, por sipas planit të kryebashkiakut. Kështu, paraqitja e 15 ofertave për këtë tender ishte thjesht për të justifikuar pjesëmarrjen në tenderin fasadë. 14 prej kompanive u skualifikuan që në fazën e parë duke mos iu dhënë asnjë mundësi për konkurrim. Për 5 prej tyre është dhënë argumenti i skualifikimit se kanë “mungesë dokumentacionesh”, ndërsa 9 oferta të tjera janë përjashtuar pa asnjë sqarim, të paktën arsyet nuk janë bërë publike në formularin e shpalljes së fituesit paraprak.
Duke fshirë nga gara 14 oferta të vlefshme, Veliaj shpëtoi nga konkurrenca firmën “Kthella” SHPK, në pronësi të Pjetër Nikollit, që e kishte piketuar si fituese të këtij projekti gjigand. Kështu Nikolli, siç është mësuar tashmë, e mori tenderin pa garë. Prokurimi u përmbyll më datë 20 gusht 2024, por për 1 muaj fituesi është mbajtur larg syve të publikut, ndoshta për të fshehur shkeljet e bëra.
Open Data Albania i ka ngritur tenderit “Flamurin e kuq”, që është shenja e riskut të korrupsionit.
Në përshkrimin e vlerësimit konstatohet “skualifikim i të gjithë konkurrentëve, përveç fituesit”.
Ndërkohë, firma është e mbingarkuar me tendera nga zyrtarët e korruptuar, “Kthella” është e zënë me një projekt tjetër publik dhe nuk ka kapacitet të kryejë dy punë voluminoze në të njëjtën kohë. Kujtojmë se një muaj më parë Ministri i Mbrojtjes, Niko Peleshi i ka besuar kësaj kompanie tenderin prej 1.8 milionë euro me objekt: “Ndërtimi i infrastrukturës së garnizonit stërvitor, Pajet – Bizë, Tiranë”.
Ky tender ishte me shkelje dhe u pezullua një farë kohe nga KPP pas denoncimeve të firmave pjesëmarrëse.
Nga ana tjetër duam të prekim edhe një shkelje të rëndë të bërë gjatë tenderit të Veliajt në favor të kompanisë KTHELLA. Oferta e kësaj kompanie prej 154,643,880.29 lekë, në bazë të ligjit mbi prokurimet është “anomalisht e ulët”, sepse rezulton 25% më e ulët se fondi limit prej 2.4 milionë euro. Në këto kushte, oferta e kompanisë KTHELLA duhej skualifikuar.
Kujtojmë se kryetari i bashkisë Tiranë, Erion Veliaj është thirrur në SPAK në lidhje me korrupsionin me tenderat deh dhënien e koncesionit për inceneratorin e Tiranës.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post