Një kryebashkiak i korruptuar është fatkeqësi më e madhe për banorët se sa tërmeti, përmbytjet apo zjarret! Ndërkohë që rindërtimi i pallateve të dëmtuara nga tërmeti i vitit 2019 ka mbetur propagandë dhe qytetarët mashtrohen me “bonuse qiraje”, Kryetari i Bashkisë Tiranë, Erion Veliaj, bën tender t’i japë klientit të tij 413 milionë lekë për të studiuar riskun nga fatkeqësitë.
Me këto lekë do të parashikohet sa tërmete mund ta godasin kryeqytetin 7 vitet në vijim, sa dëme do të shkaktojnë, si do të ruhemi prej tyre, si do ta bëjmë rindërtimin. Këtë bënë të mundur Lali Eri, duke ua marrë funksionet Akademisë së Shkencave, Universitetit, Sizmologjisë, Agjencia Kombëtare e Mbrojtjes Civile dhe institucioneve të tjera që i kanë fokus këto fenomene.
Nga ana tjetër, ligji e urdhëron kryetarin e Bashkisë Tiranë që në buxhetin vjetor të planifikojë 4 % të vlerës totale për Emergjencat Civile.
Po të shohim tabelën e buxhetit për vitet 2023, 2024, 2025, 2026, janë ndarë për këtë qëllim zero lekë.
Nëse ndodh një fatkeqësi (larg qoftë!) Lali Eri dhe këshilli i tij bashkiak kanë ndarë zero lekë fond rezervë, zero lekë fond kontigjence. Ndërsa për shërbimet e mbrojtjes nga zjarri janë ndarë vetëm 1% e buxhetit të bashkisë.
Mirëpo, Lali Eri i shqetësuar për atë që mund t’i kanoset kryeqytetit në 7 vitet e ardhshme, heq nga buxheti i bashkisë për vitin 2024 jo pak, por 413 milionë lekë.
Duke iu kthyer në fokus të kësaj teme, po ju tregojmë se Bashkia Tiranë do të hartojë një plan për vlerësimin e riskut nga fatkeqësitë natyre. Bëhet fjalë për tenderin me objekt ‘Për miratimin e Vlerësimit të Riskut nga Fatkeqësitë e Strategjitë për zvogëlimin e Riskut nga Fatkeqësitë 2023-2030 në Nivel Lokal’.
Siç shihet bëhet fjala vetëm për hartimit e një plani. Kjo është tabela e përmbylljes së punës:
Kompania që ka caktuar Lali Eri t’i përfitojë këto lekë duhet të ketë 2 ekspertë gjeodezie, një ekspert për menaxhimin e riskut të fatkeqësive, një inxhinier ndërtimi dhe një ekspert të zhvillimit ekonomik social lokal. Po mirë, nuk ju mjafton Drejtoria e emergjencave civile e bashkisë për ta bërë këtë studim? Nëse drejtoria i ka të paftë njerëzit, atëherë të bëhet konkurs sipas statusit në nëpunësit civil dhe të merren në punë njerëz me këto njohuri dhe diploma.
Sakaq, sipas dokumentit të publikuar shohim që për këtë tender janë paraqitur 3 oferta dhe fituese është shpallur kompania “UTS – 01” shpk, në pronësi të Markel Baballëkut.
Tenderi ka nisur më 19 shtator 2023 dhe ka përfunduar në i denoncuar në Komisionin e Prokurimit Publik. Më datë 30 nëntor 2023, KPP, pasi shqyrtoi informacionin e paraqitur vendosi: Të mos pranojë ankesën e paraqitur nga operatori ekonomik “Abkons” SHPK. Nuk dihet pse u vonua Lali Eri deri në 19 mars 2024 për të lidhur kontratën me fituesin, por është e qartë se ky tender është shpikur thjesht për të nxjerrë paratë nga arka e bashkisë dhe për të kredituar llogarinë kompanisë private.
Nuk mjaftonte ky fond, por Lali Eri u heq edhe miliona të tjera taksapaguesve kryeqytetas sërish për “Emergjencat”.
Një tender me fond limit 83 milionë lekë kërkon konsulencë për projektin e emergjencave në kopshte!
Po pse nuk e përfshin tenderi i fituar nga profesor Baballëku këtë lloj risku?! Më datë 29 mars 2024 do të zhvillohet edhe tenderi me objekt “Studim Projektime në Programin e Çështjeve të Përgjithshme Ekonomike”. Edhe me këtë prokurim, ku do të dalin nga arka 83 milionë lekë, Lali Eri do të hartojë një plan sigurie për mbrojtjen e kopshteve dhe çerdheve nga fatkeqësitë natyrore.
Dy vjet punë për ta hartuar këtë planin që kushton 83 milionë lekë! I paskemi pasur fëmijët në rrezik të madh e nuk e paskemi ditur!
Fakti tjetër që po del në dritë është se sa më shumë drejtorë të Veliajt vihen nën hetim nga SPAK, aq më shumë kryetari po e rrit dozën e shpërdorimeve të parave të taksapaguesve kryeqytetas.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post