Nëse ndiqni aktivitetin e Erion Veliajt e kuptoni se puna për të cilën ai angazhohet më pak është detyra e kryetarit të bashkisë së Tiranës. Ai ka shumë punë njëkohësisht dhe punët e bashkisë duket se janë më të parëndësishmet për të. Ai është kryetar i bashkisë së Tiranës, është drejtues politik i Partisë Socialiste në qarkun e Tiranës, është aktivist i progresizmit anekënd botës, por është edhe një turist shumë i përkushtuar.
Vetëm javën e fundit, Veliaj ka qenë njëkohësisht në një vizitë disa-ditore në Gjermani, ka drejtuar takimet për riorganizimin e Partisë Socialiste në disa degë të qarkut të Tiranës, ka vizituar dy shkolla të rindërtuara në Laprakë, ka pritur grupin e miqësisë Shqipëri-Greqi pranë parlamentit grek, ka celebruar disa herë hapjen e negociatave për anëtarësimin e vendit në BE dhe ka gjetur kohë që të shkojë në pishinë gjatë fundjavës. Ai gjithashtu ka përmirësuar ndjeshëm jetën dhe ekonominë e familjeve të Tiranës duke emërtuar rrugë të reja dhe duke nderuar me çmime disa personalitete që janë edhe miq të ngushtë të Veliajt.
Natyrisht që nuk keni marrë asnjë informacion për numrin e lejeve të ndërtimit që ai ka dhënë, për tenderat që janë zhvilluar dhe fituesit e paracaktuar, në përgjithësi me ofertën më të shtrenjtë, apo për ndonjë mbledhje të Këshillit Bashkiak. Këto nuk janë çështje që u interesojnë qytetarëve. Ajo që i shqetëson qytetarët e Tiranës në këtë verë të nxehtë dhe të thatë është nëse Rita Ora do të vijë të këndojë në Tiranë më fillim të shtatorit.
Kryeqyteti Europian i Rinisë ka nevojë për një koncert në fund të pushimeve që të mbledhë mendjen për punë. Aq më shumë që koncerti do të jetë falas për qytetarët, sepse tarifën e ka paguar vetë bashkia. Kështu, Rita nuk ka nevojë të lodhë ekipin e saj për të mbledhur paratë e biletave dhe menaxhuar hyrjet, as të paguajë për qiranë e stadiumit apo sallës. Nuk ka rëndësi se sa është shuma që i ka dhënë Erion Veliaj këngëtares. Ato janë para të bashkisë, jo të qytetarëve.
Autobusët e shërbimit të transportit publik vazhdojnë të jenë ferr gjatë kësaj vere. Pa ajër të kondicionuar, pa ventilim, të pistë dhe të rrallë, ata shërbejnë si një seancë torture për qytetarët, që t’u kujtojnë atyre se ende jetojnë në një qytet të botës së tretë. Qytetarët e pastrehë vazhdojnë të enden dyerve të agjencive bashkiake për të gjetur një mik që i sistemon ata në një listën kredish të buta.
Fëmijët në kopshtet dhe çerdhet e kryeqytetit vijojnë të mos kenë ajër të kondicionuar. Ushqimi i tyre me kosto disa herë më të lartë se çmimi real në treg, vijon të jetë i cilësisë së diskutueshme. Kopshtet dhe çerdhet, ashtu si ujësjellësi dhe ndërmarrjet e tjera bashkiake, janë po ato streha të militantizmit, ku profesionistët nuk gjejnë asnjë mundësi punësimi. Qytetarët e lagjeve të tëra të qytetit kanë vetëm 1 deri në 2 orë furnizim me ujë. Cilësia e ujit është katastrofike, që në lagje të caktuara arrin deri në vlera ndotjeje deri 6 herë mbi maksimumin e lejuar.
Rrugët e Tiranës, edhe këtë verë, janë të mbingarkuara me trafik. Bashkia nën drejtimin e Erion Veliajt ka menduar për t’i bërë ato edhe më të ngushta dhe më të vështira për qarkullim, duke shtuar korsi biçikletash që nuk i përdor askush.
Por ju nuk do ta shihni kryetarin e Bashkisë të merret me këto gjëra. Ai ka punë shumë më të mëdha për të bërë. I duhet të integrojë Shqipërinë në BE, të forcojë marrëdhëniet me vendet fqinje, të marrë pjesë në forume ndërkombëtare për shtete me të cilat nuk na lidh asgjë, si Sri Lanka, dhe të udhëtojë shumë nëpër botë. Sepse ai nuk është ngjitur në atë detyrë me votën e qytetarëve. Prandaj, nuk ndjen asnjë detyrim që të punojë për ta.
Discussion about this post