Këtë të premte u zhvillua protesta e 12-të para Bashkisë së Tiranës, me tubuesit që kërkuan dorëheqjen e Erion Veliaj si kryebashkiak dhe arrestimin e tij. Veliaj cilësohet “pronari faktik i inceneratorit të Tiranës” dhe “koka e drejtorëve hajdutë” të aferës “5D”.
Organizimi ishte i ngjashëm me tubimet e mëparshme, ndërsa pati edhe momente tensioni. Drejt fasadës së bashkisë u hodhën molotov, si dhe u dogjën goma. Policia përdori spraj ndaj protestuesve të cilët tentuan të hiqnin gardhin metalik rreth bashkisë, i vendosur nga forcat e rendit.
Nga mikrofoni i protestës, përfaqësues të opozitës këmbëngulën se tubimet do të jenë të vazhdueshme deri sa të arrihet largimi i Veliajt nga karrigia e kryetarit të bashkisë si dhe ai të japë llogari përpara drejtësisë.
Në fjalimet nga mikrofoni i protestës, Veliaj u cilësua “hajdut”.
“Për një të vërtetë shumë të madhe ju ftojmë të qëndroni, në Bashkinë e Tiranës është një hajdut, një fundërrinë si Erion Veliaj i cili do të marrë faturën që i takon”, tha Belind Këlliçi, anëtar i kryesisë së Partisë Demokratike.
“Veliaj më i madhi i hajdutëve. Hajdut dhe qelbësirë”, e etiketoi kryebashkiakun aktori Mehdi Malkaj.
Protesta zgjati gati një orë, ndërsa e radhës u paralajmërua ditën e premte, po në orën 11:00.
Veliaj nga ana tjetër, pretendon se nuk ka dijeni për aferat e vartësve, ndërsa sulmon në mënyrë periodike gjatë daljeve publike protestat dhe opozitën.
Discussion about this post