Që kryebashkiaku Erion Veliaj i ka futur duart thellë në buxhetin e bashkisë këtë e dinë tashmë të gjithë, sidomos pas arrestimit të drejtorëve të tij. Por kryebashkiaku nuk është i vetëm, sepse ka ngritur një rrjet të madh drejtorësh, mbikëqyrësish, supervizorësh, biznesmenësh që ia bëjnë abuzimin të lehtë. Ata firmosin, janë gatshëm të marrin përsipër rrezikun e burgut. Mbikëqyrësi i punimeve është një hallkë e rëndësishme mes shtetit si investitor dhe sipërmarrësit që zbaton projektin. Prandaj Lali Eri i zgjedh njerëzit që do të mbikëqyrin punimet, që ata t’i shërbejnë me firmosjen e faturave të punimeve. Pra që gjithçka të duket në rregull edhe me letra.
Konkretisht, po flasim për tenderin me objekt “Studim Projektim Loti I: Mbikëqyrja e punimeve për objektin “Ndërtimi tregut për shitjet me shumicë dhe pakice të produkteve ushqimore (Tirana Agrikulture) faza III-të. Këtë vepër Lali Eri ia ka besuar oligarkut Lush Osmani me kompaninë “SHPRESA-AL”. Janë 4.3 miliardë lekë, pa llogaritur TVSH që shoqëron këtë kontratë.
Dhe vetëm për mbikëqyrësin do të paguhen 52 milionë lekë, për 1 vit e gjysmë, aq është afati i punimeve.
Punimet për këtë tender kanë nisur me shkelje dhe ashtu po vazhdojnë, pasi edhe ky prokurim ka marrë “Flamurin e Kuq” nga Open Data Albania. Kjo është shenja treguese e riskut të korrupsionit.
Gara është lënë e hapur për 15 ditë dhe gjatë kësaj kohe janë dorëzuar 7 oferta të ndryshme, mjaftueshëm për të zhvilluar një garë të rregullt, gjë të cilën në fakt Veliaj nuk mund ta tolerojë.
Tenderat e Veliajt të gjithë mbajnë “Flamurin e kuq”, sepse në këtë mënyrë kërkon të kthejë në normalitet abuzimin dhe shkeljen e ligjit. Shohim në dokumente se komisioni i Veliajt i ka përjashtuar nga gara të gjithë pjesëmarrësit përveç fituesit.
IMES -D nuk kishte ofertën më të lirë, por as këtë fakt nuk e mori për bazë komisioni i Veliajt. Kryetari kërkon një njeri të besuar për këtë punë, prandaj nuk pyet për paratë. Kështu pa garë fare tenderi i është dhuruar kësaj firme me pronar Ibrahim Dragoshin. Kryetari Veliaj e gjen fjalën vazhdimisht me të tillë biznesmenë që janë të sprovuar në korrupsion dhe kanë pasur probleme me ligjin në të kaluarën.
Në vitin 2022, Dragoshi u arrestua për shkak se ishte i përfshirë në listën e biznesmenëve që falsifikuan dokumentet dhe mashtruan me punimet për godinën e Prokurorisë së Elbasanit. E kuptoni ku shkon guximi, këta s’e kanë problem të shkelin ligjin nën hundën e prokurorisë!
“Ibrahim Dragoshi, me profesion inxhinier, i dyshuar për kryerjen e veprës penale te “Mashtrimi me pasoja të rënda” parashikuar nga neni 143/3 i K. Penal dhe “Falsifikimit të dokumenteve” të parashikuar nga neni 186/2 I K.penal dhe “Mashtrimi me pasoja të rënda”, parashikuar nga neni 143/3 I Kodit Penal të kryer në bashkëpunim”, thuhet në dosje për arrestimin e biznesmenit.
Dragoshi dhe bashkëpunëtorët e tij ja hodhën paq dhe tashmë i janë futur me kokë aferave me prokurimet me zyrtarët e lartë si Erion Veliaj.
Ndërkohë, edhe tenderin për studimin dhe projektimin e ndërtimit të tregut Veliaj e ka dhënë pa garë .
Bëhet fjalë për prokurimin me objekt Studim Projektim “Ndërtimi i tregut për shitjet me shumice dhe pakice te produkteve ushqimore (Tirana Agrikulture) – Faza III-të” dhe fond limit 66 milionë lekë. Bëhej fjalë për 5 muaj punë dhe duke qenë se vlera e fitimit ishte e lartë shfaqën interes 6 kompani. Por, 5 prej tyre shërbyen vetëm si pjesëmarrës formalë, sepse Veliaj e kishte paracaktuar fituesin! Prandaj shohim që në mungesë të konkurrencës, i është dhuruar kontrata firmës “INSTITUTI DEKLIADA – ALB”.
Kështu i gjithë procesi i ndërtimit të tregut është kthyer në një vorbull që thith para në shkelje flagrante të rregullave të prokurimit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
Discussion about this post