Veliaj mund të bëhet “i penduar, Jorida Tabaku: Opozita gati për garën në Tiranë

Në një intervistë për Klan News, deputetja e PD-së Jorida Tabaku foli për çështjen politike më të diskutuar të momentit, vakanca për bashkinë Tiranë.

“Procesi ndaj Erion Veliajt reflekton kapjen e pushtetit dhe arrogancën totale. Votimi unanim i këshilltarëve socialistë që deri dje e kishin mbrojtur, tregon që sot nuk kemi më mekanizma kontrolli dhe balanca”, tha fillimisht demokratja.

Shprehu rezerva për rolin e Presidentit të Republikës, Bajram Begaj, në këtë çështje.

“Shpresoi që Presidenti të ngrihet në lartësinë e detyrës. Unë besoj tek institucionet dhe vendimet e tyre, por në këtë rast Presidenti është i kushtëzuar nga një njoftim që Gjykata Kushtetuese ka bërë. Presidenti s’mund të dekretojë një datë për Tiranën, për shkak të ankimimit i cili e pezullon shkarkimin”, sqaroi ajo.

Këtë rast e cilësoi unik, “ekzemplar” dhe madje sfidë për Kreun e Shtetit shqiptar.

Po a janë gati demokratët për të shkuar në këto zgjedhje?

“Është një vendim që do të merret kur të mblidhen strukturat. Një proces ka nisur për seleksionimin e kandidatëve, sigurisht do ketë vendime politike”, u përgjigj Tabaku.

“Se çfarë do bëjë Partia Demokratike, do e vendosin forumet!”, shtoi ajo.

E pyetur se çfarë ka ndodhur mes Ramës dhe Veliajt, bëri një deklaratë të fortë:

“Fakti që ka shkuar (Veliaj) në Kushtetuese, i hap rrugë dhe një procesi që shpresoj shumë që Veliaj të kthehet edhe në të penduar të drejtësisë!”

“Rrëzimin” e Veliajt e krahasoi me atë të ish-zv.kryeministrit Arben Ahmetaj. Më tej, tha se opozita e ka potencialin për të fituar në këto zgjedhje të parakohshme për kryeqytetin.

“Për kandidatin që kanë, sistemin që është ngritur, por edhe se njerëzit kanë nevojë për shpresë. I njëjti sistem, e njëjta fytyrë”, shpjegoi Tabaku.

Thënë kjo, a mund të jetë ajo vetë pjesë e kësaj gare të ethshme?

“S’kam asnjë diskutim të tillë, forumet do të mblidhen. Unë kam qenë në bashkinë e Tiranës, një eksperiencë që i rri të shkuarës për mua”, u përgjigj deputetja.

Kujtojmë se pavarësisht se kryeministri Edi Rama ka çuar vakancat te Presidenti Begaj, për bashkitë që do shkojnë në zgjedhje të parakohshme, përfshirë edhe Tiranën, procesi për këtë të fundit mbetet pezull derisa Kushtetuesja të thotë fjalën e saj.