Në një episod të pazakontë që ka ngjallur diskutime në rrjetet sociale dhe qarqet politike, profili zyrtar në Facebook i kryebashkiakut të shkarkuar të Tiranës, Erion Veliaj, është parë duke ndjekur drejtpërdrejt transmetimin “live” të kryeministrit Edi Rama, në të cilin ky i fundit shpjegonte arsyet e largimit të Veliajt nga detyra.
Ngjarja vjen vetëm një ditë pasi Këshilli Bashkiak i Tiranës, nën drejtimin e mazhorancës socialiste, miratoi propozimin për shkarkimin e Veliajt – një vendim që pritet të marrë vulën përfundimtare nga Këshilli i Ministrave ditën e nesërme.
Pavarësisht se data për zgjedhjet e reja nuk është shpallur ende zyrtarisht, Rama ka nisur takimet intensive, duke e trajtuar Tiranën si një betejë kyçe në hartën e pushtetit lokal. Kandidatja e re, Ogerta Manastirliu, është tashmë e pranishme në çdo aktivitet, krahas Ramës, ndërsa fushata ka marrë një trajtë të hapur.
Por pikërisht në kulmin e kësaj fushate, ndodh një moment që ka ndezur analizat dhe komentet në media: gjatë fjalimit “live” të Ramës në rrjetet sociale, profili i Erion Veliajt shfaqet mes ndjekësve aktivë të transmetimit.
Pyetja që ngrihet natyrshëm është: a ishte kjo një ndjekje e qëllimshme nga vetë Veliaj, si një mënyrë simbolike për të treguar se “është ende aty”, apo thjesht një rastësi teknologjike – ndoshta e menaxhuar nga stafi i tij digjital?
Megjithatë, simbolika është e fortë: një kryebashkiak i saposhkarkuar, që ndjek në heshtje aktin e rrëzimit të tij, ndërsa figura e re ngjitet në skenë.
Në fjalën e tij përpara strukturave të PS-së në Tiranë, Rama theksoi se u “detyrua të marrë një hap të debatueshëm në raport me Erion Veliajn, por të detyrueshëm për të ardhmen e Tiranës”.
Në sfondin e këtyre zhvillimeve, ky moment i vetëm në rrjetet sociale ka marrë vlera shumë më të mëdha, duke u shndërruar në një pikë ndarjeje simbolike midis një epoke që perëndon dhe një tjetre që sapo ka nisur.
Discussion about this post