Veliaj nuk zhgënjen/ Bën dy tenderë pa garë, njërin ia jep vëllait të deputetit të PS-së

Bashkia e Tiranës nuk ka zhgënjyer edhe në dy tenderët e fundit, ku si shumë procedura edhe kësaj radhe i ka zhvilluar me vetëm një konkurrent. Bëhet fjalë për tenderin e hapur në datën 27 janar 2022, për blerje buke për konviktet e shkollave të mesme. Procedura në fjalë ka numrin e referencës REF-17836-01-26-2022 dhe fondin limit prej 2.484.930 lekë të reja, ose rreth 25 milionë lekë të reja.

Në këtë tender ka marrë pjesë në garë vetëm një kompani, “DAJTI PARK 2007” sh.p.k, e cila edhe pse nuk ka pasur konkurrent tjetër, është shpallur fituese. Duke qenë se këto procedura shpallen me risk pasi krijojnë dyshime se fituesi mund të jetë paracaktuar, në këtë procedurë përforcohet kjo gjë. Kjo pasi kompania e cila ka fituar tenderin është në pronësi të Lulzim Qefalias, vëllait të deputetit të Partisë Socialiste, Xhemal Qefalia. Pra, Veliaj kësaj radhe ka menduar një dhuratë 25 milionëshe për mikun e familjes politike dhe për këtë nuk ka respektuar as parimin e garës.

Por Veliaj nuk ka “respektuar” vetëm vëllain e deputetit të PS-së, Lulzim Qefalia.

Në një procedurë tjetër të hapur po në të njëjtën datë, më 27 janar 2022, për blerje ushqimesh blektorale për konviktet e shkollave të mesme, është ndjekur e njëjta metodë prokurimi. Kjo procedurë mban numrin e referencës REF-17841-01-26-2022 dhe fondin limit prej 5.755.701 lekë të reja ose rreth 58 milionë lekë të vjetra.

Edhe ky tender është zhvilluar me vetëm një kompani në garë, që është shoqëria  “GERTI – 1987” sh.p.k, e cila edhe pse nuk ka pasur konkurrencë, është shpallur fituese. Jo më kot gara është zhvilluar vetëm me këtë kompani, pasi kompania në fjalë është një nga të preferuara të qeverisë. Kjo shoqëri zotërohet nga Elgert Laskaj, me zyra qendrore në fshatin Çarshov të Gjirokastrës dhe është një nga kompanitë që ka dalë fituese në disa tenderë të qeverisë. Kësaj radhe ka marrë edhe favorin e Bashkisë së Tiranës ku i ka mundësuar një tender 58 milionë lekë pa konkurrent.

Të dy tenderët janë futur në kategorinë e flamurit të kuq nga “Open Data” me arsyetimin e mungesës së konkurrencës. Erion Veliajt i ka dalë nami si punëmbarruar i zot dhe gjithmonë di si të shpërblejë miqtë e qeverisë dhe shokët e Partisë Socialiste.

Gijotina.com