Avokatët e kryebashkiakut të Tiranës, Erion Veliaj, i janë drejtuar sërish Gjykatës Kushtetuese, duke paraqitur një padi për përshpejtimin e shqyrtimit të kërkesës së tyre që kundërshton masën e arrestit me burg ndaj tij.
Sipas mbrojtjes, masa është antikushtetuese dhe po i shkakton dëme të drejtpërdrejta në ushtrimin e detyrës si kryebashkiak, ndaj ata kërkojnë që Kushtetuesja të caktojë një datë sa më të afërt për shqyrtimin e çështjes.
Kjo lëvizje vjen dy javë pasi Veliaj, i cili ndodhet në paraburgim që nga muaji shkurt, kërkoi shfuqizimin e vendimeve të gjykatave më të ulëta që kishin miratuar masën e arrestit.
Deri më tani, Kushtetuesja nuk ka përcaktuar një datë për shqyrtimin e padisë, ndonëse më herët ka vendosur në favor të Veliajt në një proces tjetër, duke e rikthyer në detyrë pas pezullimit të vendimit të Këshillit të Ministrave.
Çështja penale ndaj Veliajt
Aktualisht, dosja penale që përfshin Veliajn dhe 30 të pandehur të tjerë, mes tyre edhe përfaqësues të disa organizatave jofitimprurëse, ndodhet në fazën paraprake të gjykimit.
Sipas SPAK-ut, të pandehurit akuzohen për korrupsion dhe pastrim parash, në lidhje me dyshime për abuzim me fonde publike dhe tendera të Bashkisë së Tiranës.
Discussion about this post