Tryeza e bashkëpunëtorëve me të cilët Erion Veliaj ndan paratë e tenderave të Bashkisë Tiranë, ka vend vetëm për biznesmenë që kanë probleme me kontratat dhe ligjin. Biznesmeni Klodian Alimadhi është një nga këta, që Veliaj e favorizon në tendera.
Këtë radhë bëhet fjalë për prokurimin me objekt “Mur mbajtës në rrugën e fshatit Vesqi – Njësia Administrative Baldushk”. Është një rrugë fshati vetëm 300 metra dhe Veliaj po shpenzon 130 milionë lekë për ta shpëtuar nga rrëshqitjet.
Sipas përshkrimit në dokumente, për shkak të terrenit dhe mungesës së investimit kjo rrugë pëson rrëshqitje gjatë ditëve ku ka shira të rrëmbyeshëm. Rruga përbën rrezik për banorët e zonës. Prandaj me këtë tender është menduar të ndërtohet një mur mbrojtëse, 300 metra përgjatë rrugës. Por në dorë të kujt kanë rënë banorët e Baldushkut?
Tenderi me “Flamur të kuq”
Procedura për tenderin u hap në 24 nëntor 2024 dhe u mbyll më datë 9 tetor 2024, ndërsa kontrata është publikuar në nëntor.
Nuk ishte nevoja për më shumë kohë shqyrtimi dhe analizim të ofertave, pasi nga 3 oferta të dorëzuara dy prej tyre komisioni i Veliajt i fshiu që në fazën e parë. Ofertën e “IGROUP” shpk me vlerë 87 milionë lekë, Veliaj e ka konsideruar “anomalisht të ulët”. Epo, normal se po ta frysh fondin limit, ofertat e tregut duken anormale.
Ndërsa ofertën tjetër që gjithashtu ishte më e lirë se e fituesit, komisioni e ka skualifikuar me argumentin se nuk ka paparaqitur deklaratën e dokumentuar për drejtuesin teknik që duhet të zotërojë kompania.
Ja kështu, pa asnjë konkurrent kaloi në “finale” oferta e firmës “G . A . C”, në pronësi të Klodian Alimadhit.
Open Data Albania i ka vendosur tenderit “Flamurin e Kuq”, që është shenja e riskut të korrupsionit.
Alimadhi nuk zbaton konratat
Kujtojmë se në vitin 2023 është publikuar një raport ku theksohet se kompania “G.A.C” me administrator dhe pronar Klodian Alimadhi ka abuzuar me zbatimin e kontratës me vlerë 1 milionë USD, me objekt zgjerimi i sistemit të lokalizimit të defekteve në linjat e tensionit të lartë të dhënë nga OST, duke përfituar padrejtësisht paratë për punë të pakryera.
Sipas informacioneve, kompania G.A.C fitoi në vitin 2020 tenderin 1 milionë dollarë me firmën e drejtorit të OST, Skerdi Drenova, një zyrtar publik i lakuar për abuzime me vlerë miliona euro.
Në këtë procedurë Klodian Alimadhi ka konkurruar me veten e tij, pasi nuk ka pasur pjesëmarrës të tjerë në garë.
Si rrjedhojë, siç evidentohet në dokumentin më poshtë, diferenca mes fondit limit dhe ofertës fituese ishte qesharake.
Si mos të mjaftonte oferta fituese në kufirin e fondit limit, pra fitimi që në procedurë, kompania G.A.C ka mashtruar edhe me zbatimin e kontratës, duke thelluar skandalin.
Nga ana tjetër, bashkia nuk duhet të rrezikonte duke ia dhënë tenderin një kompanie që është e angazhuar ndërkohë në një tjetër kontratë. Në muajin shtator 2024, Veliaj i fali Klodian Alimadhit kontratën 220 milionë lekë, për një tjetër mur mbrojtës, për një rrugicë në Kombinat. Edhe ajo kontratë mban “Flamurin e kuq”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post