Një operacion qeveritar, i drejtuar nga zv.kryeministrja Belinda Balluku, zbuloi në shtator të vitit 2022 se biznesmeni Armand Lilo, ka ndërtuar plot 4600 metra katrorë pa leje në kullën “Syri i Tiranës”, në qendër të kryeqytetit dhe vetëm pak metra larg në vijë ajrore nga zyra e kryebashkiakut Erion Veliaj. Aksioni qeveritar u duk se do t’i dridhte këmbët kryetarit të Bashkisë së Tiranës, i cili kishte dështuar së bashku me strukturat e tij të vartësisë për të identifikuar katet pa leje, jo vetëm të Lilos, por edhe të Pëllumb Salillarit, Julian Morinës, Arben Malokut e të tjerë ndërtuesve në kryeqytet.
Diçitura: IKMT kallëzoi “Ideal Construction” për katet pa leje te “Syri i Tiranës”
Megjithatë, furtuna në gotë e operacionit kaloi shpejt dhe Veliaj ri-forcoi pozitat e tij përballë dyshes Belinda Balluku-Bledi Çuçi. Madje, kaq e fortë ishte prezantimi i forcës politike të Erion Veliajt, sa ai nuk e ka aspak problem që të përfshihet në marrëdhënie biznesi me kompaninë “Ideal Construction” të Armand Lilos, i njohur edhe si njeri i afërt i ish-ministrit të Brendshëm, Fatmir Xhafaj, mbështetës i hapur i kryebashkiakut të Tiranës.
Në janar të këtij viti, Këshilli Bashkiak i hapi rrugë Bashkisë së Tiranës dhe Armand Lilos që të nënshkruajnë një kontratë shkëmbimi. Sipas këtij akti, kompania e Lilos do të ndërtojë një shtesë me sipërfaqe mbi 700 metra katrorë në kullën “Syri i Tiranës” dhe në këmbim të truallit publik do t’i falë Bashkisë 50 përqind të ndërtimit të ri.
Diçitura: Vendimi i Këshillit Bashkiak
Pra, u “fal” ndërtimi i paligjshëm, u harrua hetimi penal që po zhvillon prokuroria e Tiranës për Armand Lilon dhe tashmë Veliaj e ndërtuesi i dhanë dorën njëri-tjetrit, sikur asgjë të mos ketë ndodhur.
“Gijotina” ka siguruar Marrëveshjen e plotë, të nënshkruar ndërmjet shoqërisë ‘Ideal Construction” dhe Bashkisë së Tiranës, të përfaqësuar nga Arbjan Mazniku, zëvendësi i Erion Veliajt.
Negociatat me ndërtues të paligjshëm
Marrëveshja Bashki-Lilo jep disa detaje mbi negociatat e zhvilluara mes palëve. Sipas këtyre bisedimeve, Bashkia e Tiranës do të vendosë në dispozicion të kompanisë ndërtuese truallin, ku gjendet aktualisht Dhoma e Tregtisë, në hyrje të Sheshit “Skënderbej”, me qëllim ngritjen e një godine plotësuese të kullës “Syri i Tiranës”.
Sipërfaqja e re ndërtimore e godinës do të jetë mbi 700 metra katrorë. Marrëveshja parashikon që 50 përqind të sipërfaqes së ndërtimit do t’i kalojnë në pronësi Bashkisë së Tiranës.
Diçitura: Draft-kontrata Veliaj-Lilo, e miratuar nga Këshilli Bashkiak
Negociatat janë zhvilluar në Nëntor të vitit 2022, në një kohë kur qeveria kishte kallëzuar penalisht Armand Lilon, pikërisht për kate shtesë në kullën ‘Syri i Tiranës”.
Marrëveshja Veliaj-Lilo
Subjekti privat ka paraqitur ofertën Përfundimtare të negocimit për llogari të truallit dhe ndërtesës, konkretisht:
– Për truallin që do të vihet në dispozicion të projektit përkatësisht pasurita nr. 2/377 me sipërfaqe 1042 m2 truall, në pronësi të Bashkisë Tiranë, Shoqëria “Ideal Construction” shpk, ofron për Bashkinë Tiranë, 50 % të sipërfaqes ndërtimore mbi dhe nën tokë, në objektin e ri që do të ndërtohet.
– Për ndërtesën me sipërfaqe totale prej 766 m², e pozicionuar mbi truallin me numër pasurie 2/377, ZK. 8380, Godinë njëkatëshe e “Dhomës së Tregtisë dhe Industrisë, Tiranë”, shoqëria “Ideal Constuction” shpk ofron për Bashkinë Tiranë, 50% të sipërfaqes ndërtimore, ndërtim i ri mbi tokë, në objektin e ri që do të ndërtohet.
– Shoqëria “Ideal Construction” shpk ka paraqitur ofertën Përfundimtare, protokolluar në Bashkinë Tiranë me nr prot. 44815, datë 19.12.2022, duke shprehur dakordësinë që pjesa përfituese e Bashkisë Tiranë që do të përfitojë nga dhënia me sipërmarrje e pasurisë në pronësi të saj, të jetë 50 % e sipërfaqes ndërtimore për llogari të truallit dhe 50 % sipërfaqe ndërtimore për llogari të ndërtesës mbi të.
– Gjithashtu në të njëjtën kohë Sipërmarrësi duhet që, sipërfaqen ndërtimore që përfiton Bashkia Tiranë, si rezultat i këtij negocimi, ta vërë në dispozicion në ndërtimin e ri, që do të ndërtojë mbi pronën në pronësi të Bashkisë Tiranë, objekt negocimi, në bllok, mbi tokë dhe nën tokë.
Diçitura: Detajet e kontratës së shkëmbimit
Në përfundim, Bashkia e Tiranës, lidh kontratën e sipërmarrjes me zhvilluesin privat për pasurinë me nr. 2/377, zk. 8380 me emërtim “Godinë një katëshe” e Dhomës së Tregëtisë dhe Industrisë”, në pronësi të Bashkisë Tiranë, me sipërfaqe totale 1042 m2 truall dhe 766 m2 ndërtesë, duke përfituar;
– 50 % të sipërfaqes ndërtimore, për llogari të truallit të vënë në dispozicion të projektit, me sipërfaqe totale 1042 m² truall, prona në pronësi të Bashkisë Tiranë
– 50 % të sipërfaqes ndërtimore, për llogari të ndërtesës e cila ndodhet mbi këtë truall, me sipërfaqe të përgjithshme ndërtimore 766 m2, prona në pronësi të Bashkisë Tiranë
Konkretisht, për llogari të ndërtesës, Bashkia Tiranë do të përfitojë përveç 50% sipërfaqe ndërtimore për llogari të truallit, plus një sipërfaqe prej 383 m2 për llogari të ndërtesës me shkallë amortizimi 75% mbi këtë truall, megjithëse ky objekt do të prishet, në kushtet që do të zbatohet leja e ndërtimit mbi truallin objekt negocimi.
Përfundimisht siperfaqes ndërtimore mbi tokë në ndërtimin e ri që do të përfitojë Bashkia Tiranë nga ky negocim për llogari të truallit do ti shtohet dhe sipërfaqja ndërtimore prej 383 m² ndërtim i ri mbi tokë për llogari të ndërtesës së vënë në dispozicion të zhvilluesit nga Bashkia Tiranë.
Katet pa leje të kullës “Syri i Tiranës”
Në 19 Tetor 2022, Këshilli i Rregullimit të Territorit (KRRT), nën drejtimin e kryeministrit Edi Rama, miratoi vendimin “Për transferimin në favor të shtetit me kontratë premtim shitje me vlerë 1 euro, të sipërfaqes së ndërtimit në objektin: “Godinë polifunksionale “Eyes of Tirana” 6, 8, 9, 13, 18 dhe 24 kat, me 4 kat nëntokë, faza e I-rë”, me vendndodhje në Bashkinë Tiranë, me subjekt zhvillues shoqërinë “Ideal Construction” sh.p.k”.
Diçitura: Njoftimi i KRRT për transferimin “1 euro” të kateve pa leje tek “Syri i Tiranës”
Në bazë të këtij vendimi, lexohet qartësisht se kompania ndërtuese i është “bindur” qeverisë dhe ka dorëzuar sipërfaqen pa leje në kullën në qendër të Tiranës. “Ideal Construction” e Armand Lilos rezulton se deri më tani është e vetmja që ka pranuar “marrëveshjen” me qeverinë, pasi iu zbuluan kate që kanë tejkaluar lejen e ndërtimit. Ndërkohë, kompani të tjera, për të cilat qeveria deklaroi se i kapi në flagrancë me kate pa leje, po zhvillojnë beteja gjyqësore, ku kundërshtojnë gjetjet nga operacioni Balluku-Çuçi.
Lexo edhe: Pazari me Armando Lilon e “Arlis” dogji pasurinë e Edison Frakullës
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post