Kreu i Bashkisë së Tiranës, Erion Veliaj, ka nisur një fushatë kundër Presidentit aktual të FSHF-së, duke shfrytëzuar postin e tij duke ndërhyrë hapur në zgjedhje për të mbështetur kandidatët e tij.
Në audiopërgjimin e sotëm, Veliaj shantazhonte anëtarët e Shoqatës Tirana me fjalë jo etike dhe se do të ndërhynte SPAK dhe Prokuroria e Tiranës në këtë punë, në mënyrë që anëtarët e Shoqatës të mbështesnin kandidatin e tij.
Në një intervistë për mediat, Veliaj është justifikuar duke thënë se nuk e ka përmendur SPAK-un dhe se presionin e kishte për UEFA-n dhe FIFA-n, që t’i bëjnë llogaritë mirë.
“Jo, jo, jo, unë thashë tjetër gjë. Është pala tjetër ajo që thotë ‘SPAK të arrestojë’. Unë s’e kam thënë kurrë. Madje thashë në Bashkinë e Tiranës, vjen KLSH-ja për një letër higjienike, kurse këta janë një ishull që SPAK nuk i prek. Mua më kanë zgjedhur këta prindër të fëmijëve që lozin futboll dhe për këta unë do të luftoj jo UEFA-n por të gjithë planetët bashkë. UEFA dhe FIFA t’i bëjnë llogaritë mirë sepse po fjete me qentë, do të zgjohesh me pleshta. Pyetja nuk është për mua, por për Dukën. Do ta mbyllësh me turp apo do thuash ‘boll më gjashtë mandate’. Është me rotacion, jo me insistim” – u shpreh Veliaj.
Kreu i Bashkisë së Tiranës doli blof edhe në një deklaratë tjetër të tij. Në audiopërgjim dhe në konferenca ai është shprehur se do ketë kallzim ndaj Armand Dukës, ndërkohë në një prononcim për BIRN, SPAK dhe Prokuroria e Tiranës, e përgënjeshtruan këtë gjë duke thënë se nuk ka ardhur asnjë kallëzim ndaj Armand Dukës.
Për këtë, Veliaj është justifikuar duke thënë se kallëzimin do ta bëjë ditën e nesërme.
“Nesër ne do të bëjmë dy kallëzime penale. Do bëjmë një kallëzim për sekretarin e Përgjithshëm të FSHF dhe një kallëzim penal për sekretarin e përgjithshëm të Shoqatës, ata të shoqatës së vjetër dhe besoj që do t’i bashkohet vandakut të madh që prokuroria sot ka në dispozicion. Vandaku vetëm po rritet në të gjithë fushat ku ata ushtrojnë një veprimtari thellësisht kriminale, se sot të gjithë i zgjedhin zgjedhësit, kurse këta zgjedhin zgjedhësit që duan dhe i vënë pastaj si vezë nëpër pikerinat e shoqatës” – u shpreh Veliaj.
Discussion about this post