Mijëra familje me shtëpi të dëmtuara nga tërmeti mbeten të pastrehë si pasojë e zvarritjes dhe mungesës së fondeve, ndërsa kryetari i Bashkisë Tiranë, Erion Veliaj, ka prioritet parkingjet.
Së fundmi, do të prishet Sheshi “Avni Rustemi” në Tiranë, që është monument kulture bashkë me godinat përreth, ku do të hapet një gropë për parking. Janë 7 milionë euro me të cilat mund të bliheshin shtëpi ose të ndërtoheshin pallate për një pjesë të familjeve të pastreha.
Kush janë më urgjente familjet e pastreha apo parkingu?
Shumë pallate u shembën pasi paraqisnin rrezik dhe banorëve iu premtuan apartamente në zonën e 5 Majit dhe në Kombinat Edhe pas 4 vitesh familjet ndodhen të pastreha, madje tashmë nuk marrin as bonusin e qirasë.
Kujtojmë se Kryeqyteti raportonte në atë kohë në raportin e dëmeve të tërmetit, se 35085 banesa janë jashtë funksionit. Më urgjente ishte nevoja e 922 familjeve që u evakuuan nga shtëpitë e dëmtuara dhe u trajtuan fillimisht me bonus qiraje.
Zvarritja e procesit të përfundimit të banesave ka bërë që ende mijëra familje të mbeten peng i shtëpive me qira, ndërkohë që procesi i rindërtimit që “negociohej” në tavolinë, është katandisur në kantiere të shkreta ku nuk vazhdon puna.
Epo Veliaj nuk do t’ia dijë për këto, përqendrimi i tij është tek interesat e oligarkëve. Më datë 27 mars Bashkia Tiranë ka hapur thirrjen për tenderin me objekt Rehabilitimi i fasadave & rrugës Luigj Gurakuqi deri tek sheshi Avni Rustemi (me parkim 2 kate nën tokë). Futja e fasadave në të njëjtin tender me parkingun bëhet thjesht për të fryrë fondin limit, pasi aty të gjitha godinat janë rregullta dhe të kuruara nga jashtë.
Sigurisht që janë paratë e taksapaguesve të kryeqytetit, që shkojnë për parking. Burimi i financimit: të ardhurat e Bashkisë Tiranë për vitin 2024, miratuar me VKB Nr.125, datë 22.12.2023 “Për miratimin e programit buxhetor afatmesëm 2024-2026 dhe detajimin e buxhetit të Bashkisë së Tiranës për vitin 2024”.
Dhe fondi limit për këtë tender është 7 milionë euro për të strehuar 200 makina. Ky është një investim i panevojshëm, një zonë ku nuk mungojnë parkimet nëntokësore dhe sipërfaqësore në afërsi të sheshit.
Po fasadat pse duhen bërë nga e para?
Kompania që do ta marrë fondin 7 milionë euro duhet të jetë e ndonjë oligarku që ka bërë edhe punime të tjera për bashkinë në sheshin “Skënderbej” ose është duke ndërtuar ndonjë kullë aty afër. Nuk ka si shpjegohet që projekti i “Avni Rustemit” kalon pa oponencën e Institutit Kombëtar të Trashëgimisë. Kujtojmë se Sheshi Avni Rustemi, i pozicionuar vetëm 500 m larg sheshit kryesor të Tiranës, i ndërtuar në 1935, gëzon statusin e monumentit të kulturës së kategorisë së II që prej vitit 2007.
Dhe së fundi, a është pyetur njeri, a është bërë konsultim publik me banorët dhe bizneset pranë sheshit për këtë ndërtim. Theksojmë se ky kantier zyrtarisht do të qëndrojë hapur 18 muaj, por (siç ndodh rëndomë) nuk përjashtohet mundësia t’ua nxijë jetën qytetarëve për vite me radhë, duke bllokuar rrugën kryesore dhe sheshin.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post