Bllokimi dhe rënia e ashensorit në një pallat në zonën e “Astirit” rrezikoi jetën e 5 personave. Por, aksidente të tilla me pasoja të rëndë kanë ndodhur edhe më parë në Tiranë, siç është rasti i 30-vjeçares Drilona Duricit, e cila humbi jetën pasi flakët përfshinë kabinën metalike. Por çfarë ka bërë bashkia e Tiranës për të parandaluar ngjarje të tilla dhe çfarë thotë ligji për këtë çështje?
Ligji i miratuar 10 vite më parë për administratorët e pallateve përcakton se çdo ndërtesë do të ketë një person që do të merret me zgjidhjen dhe mirëmbajtjen e ambienteve të përbashkëta të banorëve të pallateve. Rezulton se në Tiranë vetëm një e katërta e pallateve kanë administrator, ndërkohë që vetë kryetari i Bashkisë Tiranë, në vitin 2016 deklaroi se ky proces do të përfundonte brenda vitit 2017. Madje është ngritur një Task-Forcë për të mundësuar zgjedhjen e administratorëve të pallateve, por deri më sot vetëm ¼ e pallateve të banimit në Bashkinë Tiranë, kanë mundur të zgjedhin administratorin e tyre. Deri në vitin 2016, Tirana numëronte rreth 5 mijë pallate gjithsej, e deklaruar kjo dhe nga kryebashkiaku Erion Veliaj gjatë fjalës së tij për vënien në funksion të ligjit për administrimin e pallateve. Në atë kohë, Veliaj deklaroi se në Tiranë ishin 5 mijë pallate dhe brenda vitit 2017, të gjitha pallatet do të kishin administratorin e vet. Por, deri në fund të vitit 2019, ky proces u la në heshtje.
Me ardhjen në krye të Bashkisë Tiranë, Erion Veliaj ndërmori vënien në funksion të këtij ligji brenda dy viteve, ndërsa gjithçka e nisi nga njësia nr.1 e cila aktualisht numëron 51 264 banorë dhe në total 47 administratorë të licencuar. Pas trajnimeve nga bashkia, të interesuarit morën licencën për kryerjen e kësaj detyre. Sipas të dhënave numërohen 833 administratorë në 11 njësitë administrative, të pozicionuar në pallate e zona të ndryshme. Kjo tregon se nga 934 të certifikuar si administratorë në Librin e administratorëve, rreth 101 nuk kanë mundur ende të administrojnë një pallat.
Pas tërmetit të 26 nëntorit, miratimi i vendimit të këshillit bashkiak në Tiranë për heqjen e depozitave të ujit nga tarracat e pallateve riktheu në vëmendje administratorët e pallateve, të cilat janë ura lidhëse mes bashkisë dhe banorëve. Siç e kemi raportuar në gijotina.com depozitat e ujit gjenden ende në tarracat e pallateve dhe asgjë nuk ka ndryshuar përveçse është përdorur si temë në regjistrimet filmike qe bashkia ka shpërndarë të gatshme për mediet.
Sipas ligjit, administratori luanin rolin e urës lidhëse midis bashkisë e komunitetit. Ai lehtëson qytetarët në disa detyra kur bëhet fjalë për pronën e tyre, si dhe ndërmjetëson banorët me pushtetin vendor për çështjen të ndryshme. Në ligjin “ Për administrimin e bashkëpronësisë në ndërtesat e banimit” në nenin 20, pika c përcaktohet qartë detyrat për administratorit, ku një ndër to është: “ndërmarrjen e kontrolleve periodike, teknike dhe higjieno-shëndetësore për gjendjen e pronës e të objekteve në bashkëpronësi, si sistemi i mbrojtjes kundër zjarrit, sistemi i ngrohjes qendrore, ashensorëve, tarracave, sistemi i ndriçimit, prania e insekteve dhe e parazitëve etj. dhe i veprimeve për të zhdukur dëmtimet e pronës apo praninë e faktorëve, që mund të përbëjnë rrezik për epidemi sëmundje etj.” Duket qartë se kontrolli teknik dhe mirëmbajtja e ashensorit janë pjesë e detyrave të administratorit, por ngjarja e “Astirit” faktoi se administratori nuk e ka kryer detyrën, ashtu si kundër as kompania e kontraktuar për mirëmbajtjen e ashensorit nuk ka vepruar në kohë. Banorët dëshmuan se problemet me ashensorin ishin të vazhdueshme.
