Në një fjalim të stërzgjatur në mbledhjen me deputetë dhe ministra dy ditë më parë, kryeministri Edi Rama pranoi se korrupsioni është një problem thelbësor në qeverisjen e tij. Megjithatë, ai vetë u distancua duke u shprehur se është “i pastër” dhe pretendoi se nuk ka si të jetë në dijeni për aferat e vartësve.
Një hapësirë të konsiderueshme të fjalës së kreut të qeverisë e zuri çështja e korrupsionit, teksa paralajmëroi se “do të lëshojë çdokënd” që kapet në afera. Mesazhe që u interpretuan si paralajmërime për kryebashkiakun e Tiranës Erion Veliajn, për të cilin opozita kërkon dorëheqjen për aferat e iniceneratorit të Tiranës dhe asaj “5D”.
Megjithatë, në një fjalim publik këtë të enjte, në kuadër të një takimi me strukturat politikat, Veliaj shfaqi një qëndrim të ngjashëm si Rama. Ai pranoi korrupsionin në radhët e socialistëve, duke përdorur megjithatë një gjuhë shumë më pak të ashpër të ashpër se Rama, i cili i etikoi si “llumë”, “parazitë” apo “tradhtarë” socialistët që kapen në korrupsion. Megjithatë, Veliaj, njësoj si shefi i tij politik, pretendoi se është i pastër dhe s’ka lidhje apo dijeni për aferat e vartësve.
“Familja jonë nuk është përfekte, shoh disa prej jush që jeni me syze, pasi keni probleme me sytë, unë dhe disa të tjerë kemi probleme me tëmthin, është problem i organizmit. Çfarë bën kur sëmuresh, si i adreson kur ke një anomali? Nëse ka një problematikë ky organizëm, ne duhet ta shërojmë dhe orientojmë. Ne ndërkohë që do përgatitemi po sulmohemi”, u shpreh Veliaj.
Pas arrestimeve për procedimin penal “5D”, që zbuloi se drejtorët e Veliajt përfituan rreth 30 mln euro përmes një skeme korruptive me tendera, kryebashkiaku ndodhet në qendër të akuzave. Prej javësh, para zyrës së tij, opozita organizon protesta duke kërkuar dorëheqjen dhe arrestimin e kryetarit të Bashkisë Tiranë për aferën “5D” dhe atë të incenratorit të Tiranës.
Akuza janë hedhur edhe ndaj Prokurorisë së Posaçme, se po amniston Veliajn pavarësisht provave.
Discussion about this post