Kryebashkiaku Erion Veliaj nuk është lodhur shumë që të gjejë një maskë për Halloween, pasi atë e ka çdo ditë. Kontratat e fundit na tregojnë se Lali Eri ka zgjedhur të jetë “Ali Baba”. Me 31 tetor, Veliaj ka regjistruar në Agjencinë e Prokurimeve Publike dy tenderë me vlerë totale 640 milionë lekë. Prokurimi i parë kap vlerën e 20 milionë lekëve dhe ka si objekt blerjen e kondicionerëve për zyrat e bashkisë. Sipas të dhënave të dokumentit, tenderi do të mbyllet me datë 4 nëntor dhe deri me datë 20 nëntor, kompania duhet të ketë çuar pajisjet tek zyra e Lali Erit.
Operatori ekonomik fitues do të marrë përsipër montimin e kondicionerëve sipas kërkesave të Veliajt. Pra, nëse ky i fundit kërkon kondicioner nga këto luksozët në zyrën e tij, urdhri do të zbatohet. Pasi nuk besojmë që deri më tani zyrat në bashki kanë qenë pa kondicionerë. Veliaj ka ndryshuar mobiljet, arredimin dhe ndriçimin, i duheshin edhe kondicionerët e rinj, pasi jemi shumë afër dimrit. Ndërsa qytetarëve iu kërkohet të mos ndezin kondicionerë, pasi në nëntor do të aplikohet fasha për pagesë e dyfishtë për ata që shpenzojnë 800 kilovat e lartë. Me nga një kondicionerë në çdo zyrë, me ndriçim verbues në çdo cep të institucionit, Bashkia Tiranë i shpenzon më shumë se 800 kv, por a i paguajnë vallë?
Vlen të përmendim se në fillim të tetorit OSHEE doli në një raport ku shprehej se, “Borxhet e prapambetura ndaj Operatorit të Shpërndarjes së Energjisë Elektrike arritën në fund të 8-mujorit të këtij viti 687 milionë euro. Borxhlinjtë më problematikë të OSHEE-së përfshijnë ndërmarrjet publike, ku vetëm nga bashkitë niveli i borxhit ndaj OSHEE ka arritur në rreth 24 miliardë lekë (nga të cilat, 11 miliardë lekë janë kamatëvonesa”.
Me shtimin e këtyre kondicionerëve, përveç miliona lekëve që po shpenzon për vendosjen e tyre, Veliaj do të shtojë dhe borxhet pranë OSHEE, ndërsa do të jenë qytetarët ata që do të paguajnë barrën më të madhe.
620 mln lekë për organizimin e bashkisë
Por nuk është mjaftuar kaq! Ditën e Halloween-it, Veliaj ka hartuar edhe një tender për të përmirësuar rregulloren e strukturës së Bashkisë. Ky tender mban numrin e referencës REF-47570-10-26-2022 dhe ka të përshkruar në mënyrën më të paqartë qëllimin e këtij projekti. Pasi në dokumente thuhet se objekti i prokurimit është “Rioptimizimi dhe Standartizimi i Proceseve të punës të strukturës së institucionit të Bashkisë Tiranë”. Me fjalë më të thjeshta, 640 milionë lekë të vjetra do të shpenzohen nga taksat e qytetarëve që Lali Eri të ribëjë strukturën e brendshme të Bashkisë. Tenderi nuk është i qartë dhe përmban një shërbim që nuk përfshihet në rregulloren e prokurimeve, por me sa duket Veliaj do të ndryshojë rregullat se si punohet nga strukturat e bashkisë. Ku i dihet mbase këto ndryshime mund ta ndihmojnë në fushatën zgjedhore.
Ajo që bie në sy është se tender i mbyllet me datë 30 nëntor dhe projekti zgjat për një vit. Pra, në llogaritë e tij Veliaj parashikon që të jetë në krye të bashkisë akoma edhe nëntorin e vitit 2023, pavarësisht se së shpejti do të zhvillohen zgjedhjet vendore. Gjithsesi na mbetet të shohim deri në fund të muajit kur të publikohen dokumentet e plota të tenderit për të parë se çfarë po kurdis Veliaj në kohë fushate brenda bashkisë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post