Teksa ka folur për problematikat në vendin tonë, ish-deputeti Gerti Bogdani, është shprehur se ndërtimi i pallateve në Tiranë është marrëzi. Në një intervistë për mediat, Bogdani tha se pallatet ndërtohen për pastrim parash, pasi ka dhjetëra apartamente që nuk janë shitur. Ai është shprehur kritik ndaj qeverisë, duke thënë se kjo e fundit po u jep modelin më të keq të rinjve.
“Ndërtimi i pallateve në Tiranë është marrëzi. Përderisa ke 10-tra apartamente të pa shituara në Tiranë, pa dyshim është marrëzi të ndërtosh të tjera. Këtu vazhdon ndërtohet dhe çmimet vazhdojnë e rriten. Kjo bëhet për të pastruar para. Veliaj është një nga njerëzit që vendos për drejtimin e qytetit. Ky njeri është nga ato njerëz që lejojnë kalimin e 45 kilogramë heroinë, kushedi sa të tjera kanë kaluar. Paratë shkojnë për ndërtime Qeveria po u ofron modelin më të keq të rinjve. Modelin se I pasur bëhesh brenda natës, nëpërmjet trafikimit. Prandaj Shqipëria sot është në një udhëkryq shumë të vështirë” – u shpreh Bogdani.
Ai është ndalur dhe te shqetësimet e banorëve të “5 Majit” duke thënë se nuk e dinë se çfarë do të marrin në ndërtimet e reja. Ndërsa përsa i përket rritjes së çmimeve, Bogdani tha se qeveria nuk ka marrë masa për menaxhimin e krizës, ndërkohë shtoi se rrogat janë shumë të ulëta.
“Duke qenë se ka një valë mashtrimesh, apo një kalvar mashtrimesh dhe gjërat që thotë nuk janë të vërteta, banorët e ‘5 majit’ nuk mund t’i besojnë. Atyre u është zaptuar toka, nuk dinë se çfarë do marrin në ndërtimet e reja. Kosova ka naftën më të lirë se ne, edhe pse e merr në Durrës. Qeveria atje ka marrë masa për kompensimin e rritjes së çmimit. Këtu kjo qeveri nuk e vret mendjen. Kjo do të reflektohet në çdo çmim tjetër të mundshëm. Sot ne kemi çmimet si në BE, ndërkohë me rroga jemi si vend i botës së tretë. Se sa do vazhdojë kjo, këtë e kanë në dorë qytetarët” – tha Bogdani.
Discussion about this post