Kryebashkiaku i Tiranës, Erion Veliaj, i cili ndodhet në qeli me masën e sigurisë “arrest me burg”, vijon të përdorë rrjetet sociale për të shpërndarë mesazhe propagandistike në përpjekje për të ruajtur një imazh publik pozitiv. Në një postim të fundit në “FB”, Veliaj ka bërë një njoftim në prag të 8 Marsit, duke shpallur transport falas për gratë dhe vajzat në Tiranë.
Në mesazhin e tij, Veliaj shpreh mirënjohjen për punën dhe kontributin e grave në shoqëri dhe njofton se ka lënë porosi që të gjitha zonjat të udhëtojnë falas në të gjitha linjat e transportit urban të Bashkisë së Tiranës.
“Nesër është 8 Marsi dhe u lashë porosi kolegëve të Bashkisë që, të gjitha nënat, zonjat, dhe vajzat, të cilat i japin çdo ditë kaq shumë nga dashuria, përkushtimi dhe këmbëngulja e tyre qytetit, të udhëtojnë FALAS në të gjitha linjat e transportit urban të Bashkisë së Tiranës. Faleminderit për punën tuaj të jashtëzakonshme”, shkruan Veliaj.
Ky mesazh vjen në një kohë kur ai ndodhet në paraburgim, pas arrestimit nga SPAK me akuzat për korrupsion dhe pastrim parash.
Që prej arrestimit, Veliaj ka përdorur çdo komunikim publik për të ndërtuar një narrativë mbrojtëse dhe për të shmangur përqendrimin e vëmendjes te akuzat e ngritura kundër tij. Një tjetër linjë e qartë në komunikimet e tij ka qenë sulmi dhe përpjekja për të delegjitimuar prokurorin e çështjes, duke i paraqitur hetimet si një hakmarrje politike.
Ky postim i fundit, ndonëse i paraqitur si një gjest simbolik për Ditën Ndërkombëtare të Gruas, duket si një përpjekje për të mbajtur imazhin e tij aktiv në jetën publike dhe për të ndikuar në opinionin publik, pavarësisht pozicionit të tij të vështirë ligjor.
Ndërsa Veliaj vazhdon të përballet me drejtësinë, postimet e tij në rrjetet sociale tregojnë një strategji të qartë propagandistike për të ruajtur mbështetjen politike dhe imazhin publik. Megjithatë, mbetet për t’u parë se sa ndikim do të kenë këto përpjekje, ndërkohë që hetimet ndaj tij vijojnë, ashtu si dhe procesi gjyqësor për akuzat e rënda.
Prej gati një muaji, Erion Veliaj është arrestuar me urdhër të SPAK për korrupsion dhe pastrim parash. Nën akuzë është edhe bashkëshortja e tij Ajola Xoxa dhe disa biznesmenë. Sipas Prokurorisë së Posaçme, Veliaj dhe bashkëshortja e tij përfituan qindra mijëra euro ryshfet nga fondet e Bashkisë apo kompani kontraktore – përfitime të paligjshme që u injektuan dhe ‘pastruan’ nëpërmjet një rrjeti OJF-sh dhe kompanish të kontrolluara nga Xoxa.
Discussion about this post