Projekti “Veliera” në Durrës ishte një ndërhyrje që u krijua për të transformuar jo vetëm një zonë, por imazhin e një qyteti të tërë. Mesa duket ky projekt vijon ende, për të cilën është hapur një tender tjetër, kësaj here i firmosur nga kryebashkiakia e Durrësit, Emiriana Sako, e cila ka akorduar para të tjera për një projekt që duhet të kishte përfunduar.
Sako ka akorduar sërish 2.5 milionë euro për një tjetër tender, por kësaj herë me objekt “faza e katërt e sheshit publik para hyrjes së portit”. Me tenderin e ri, kostoja e projektit po shkon me një vlerë prej 10 milionë eurosh dhe ende nuk ka përfunduar.
Gjithashtu Projekti i “Velierës” është kundërshtuar me forcë nga arkeologë dhe shoqëria civile. Këta të fundit i bënë kërkesë gjykatës që të ndalonte punimet.
Më 22 shkurt 2019, Dhoma e Këshillimit në Gjykatën Administrative të Apelit, vendosi që t’i hapë rrugë rifillimit të punimeve, duke hedhur poshtë vendimin e Gjykatës Administrative të Durrësit. Ndërkohë ambjentalistët kanë dërguar në SPAK dosjen “Veliera”, pasi Prokuroria kishte kërkuar pushimin e çështjes për ndalimin e punimeve.
