Belind Këlliçi, që prej kohësh është shfaqur si një prej zërave më të fortë kritikë ndaj qeverisë socialiste, tashmë akuzohet se ka lidhje të ngushta me zëvendëskryeministren Belinda Balluku. Kjo e fundit, sipas shumë fakteve që po shtohen çdo ditë, del se është përfshirë në një skemë të ndërlikuar politike, ku përdor figura nga opozita për të goditur rivalët e saj politikë brenda mazhorancës. Editoriali i portalit “Timoni.al”, që sipas mediave besnike të Veliajt është i njohur për lidhjet me linjën e Sali Berishës, hodhi së fundmi akuza direkte ndaj Këlliçit, duke e portretizuar si “opozitar ditën, mburojë të Ballukut natën”. Kjo përplasje publike, është nisur në fillimi nga Çim Peka dhe e përshkallëzuar tashmë edhe nga portale pranë familjes Berisha.
Lidhjet e Këlliçit dhe Ballukut i përforcon më shumë vëllai i deputetit të PD, i cili ka qenë i punësuar si këshilltar juridik pranë Ministrisë së Infrastrukturës dhe Energjisë gjatë kohës kur ministrja e këtij dikasteri ishte Belinda Balluku. Sipas burimeve, Reshard Këlliçi ka qëndruar në këtë pozicion deri në shkurt të vitit 2023, pra pikërisht në kohën kur vëllai i tij Belindi u emërua drejtues politik i PD-së për Tiranën. Pas dorëheqjes nga Ministria, Reshard Këlliçi u angazhua si ekspert pranë Sekretariatit të Energjisë për Bashkimin Europian, një institucion kyç për politikën energjetike në Shqipëri, ku vendi ynë mbajti edhe presidencën në vitin 2023. Ky Sekretariat është në lidhje të ngushtë me Ministrinë e Infrastrukturës dhe Energjisë, e drejtuar nga Balluku, duke e përforcuar kështu rrjetin e influencës dhe ndikimit mes tyre. Në këtë kontekst, pozicioni i Reshard Këlliçit është më shumë se thjesht një punësim i zakonshëm; ai është një hallkë e rëndësishme në një strukturë ku bashkëpunimi dhe ndarja e influencës shkojnë përtej interesave institucionale.
Pikat
Sekretariati i Energjisë për Bashkimin Europian ka një marrëdhënie të ngushtë dhe të institucionalizuar me qeverinë shqiptare, veçanërisht përmes Ministrisë së Infrastrukturës dhe Energjisë. Ja disa nga pikat ku këto lidhje bëhen të dukshme: Partneritet strategjik: Sekretariati është cilësuar nga vetë ministrja Belinda Balluku si “udhërrëfyes strategjik” për Shqipërinë në përafrimin me BE-në, sidomos në sektorin energjetik. Tryeza negociatash: Ai luan rol kyç në negociatat për kuadrin rregullator të energjisë, duke ndihmuar Shqipërinë të harmonizojë legjislacionin me direktivat e BE-së. Projekte rajonale: Sekretariati ka mbështetur zhvillimin e projekteve të interkonjeksionit me Maqedoninë e Veriut, Greqinë dhe Italinë, ku qeveria shqiptare është palë aktive.
Mbështetje financiare: Bashkë me Komisionin Europian, Sekretariati ka ndihmuar në akordimin e fondeve për Shqipërinë, për projekte të energjisë së rinovueshme dhe për përballimin e krizës energjetike. Përfaqësim diplomatik: Shqipëria ka mbajtur Presidencën e Sekretariatit në vitin 2023, duke e pozicionuar veten si aktor rajonal me ndikim në politikat energjetike. Në këtë kontekst, çdo individ që mban rol ekspertize brenda Sekretariatit, si Reshard Këlliçi, ka potencial për të qenë pjesë e një rrjeti ndikimi që ndërvepron me qeverinë shqiptare në nivel teknik, diplomatik dhe strategjik.
Molotovët dhe koordinimi i sulmit ndaj Veliajt
Pra në këtë skenar politik tashmë të ndërlikuar, vjen në pah episodi i rëndësishëm që lidhet ngushtësisht me rrjetin e influencës së krijuar mes Ballukut dhe Këlliçit. Kryebashkiaku Erion Veliaj, në një letër publike, hodhi dyshime të forta lidhur me protestat e dhunshme para Bashkisë së Tiranës, ku u përdorën molotovë dhe elementë të tjerë piroteknikë për një periudhë prej një viti. Veliaj e pyeti publikisht: “Kush i koordinonte këto sulme të përsëritura? Kush i financonte për 45 javë me radhë?” Ndërsa ai nuk përmendi emra konkretë, tashmë po bëhet edhe më e qartë situata se Balluku përdori figura të opozitës, konkretisht Belind Këlliçin, për të goditur Veliajn. Kjo e nxjerr hapur se goditja ndaj kryebashkiakut nuk ishte produkt i një fushate spontane, por rezultat i një bashkëpunimi të qëllimshëm mes eksponentëve të qeverisë dhe elementëve opozitarë. Gjithashtu, nga investigimet dhe denoncimet publike, dyshohet se pas kallëzimit anonim për Veliajn që u dorëzua në SPAK, fshihet vetë Belinda Balluku.
Kjo sepse kallëzimi përmbante informacion konfidencial të regjistrave të Aviacionit Civil që nuk është i aksesueshëm lehtësisht dhe vetëm përmes lidhjeve të fuqishme institucionale mund të sigurohet. Mediat pranë Veliajt theksuan se “duart” që mund të kenë futur informacionin në regjistrat e Aviacionit Civil janë vetëm ato të Ballukut. Nga ana tjetër, ekzistojnë edhe zëra që lidhen me furnizimin e mjeteve piroteknike për protestat e Këlliçit, të cilat dyshohet të jenë siguruar nga ministri Pirro Vengu, me mbështetjen e burimeve nga ushtria, duke treguar për një organizim dhe koordinim më të gjerë e më të sofistikuar. Në këtë mënyrë, Balluku ka mobilizuar opozitën nëpërmjet Këlliçit për të përqëndruar hetimet dhe sulmet e SPAK ndaj Veliajt, duke e shënjestruar atë ndërkohë që vetë ajo vijon të jetë në qendër të aferave të mëdha korruptive, si ajo e inceneratorit të Tiranës, ku dyshohet se është koka e gjithë skemës.
Discussion about this post