Ndërkohë që vendi po zhytet çdo ditë e më shumë në krizë, kryebashkiaku i Tiranës Erion Veliaj shpenzoi miliona lekë për të zbukuruar zyrën e tij. Pak ditë më parë EUROSTAT tregoi se si Shqipëria renditet në vendet e fundit në Europë për të ardhurat për frymë. Fill pas saj, INSTAT publikoi një raport ku tregohej se 52% e shqiptarëve marrin rrogë sa paga minimale dhe një përqindje e lartë regjistrohej në kryeqytet. Por, kjo nuk ka ndonjë rëndësi për bashkinë më të madhe në vend, pasi të ardhurat për qytetarët e kryeqytetit nuk janë shqetësim për kryebashkiaktët. Veliaj, në vend që të merret me këtë situatë, të zbusë sadopak varfërinë e qytetarëve në kohë krizë, ose edhe të kursejë, vazhdon të bëjë shpenzime pa kriter për shërbime dhe mallra të panevojshme. Këtë herë kryebashkiaku që ka thyer rekord për numrin e tenderëve me shkelje, ka hapur një tender me objekt “Blerje Suvenire”, i shpallur me 22 qershor dhe ka lanë afat për oferta deri në 7 korrik.
Të dhënat e tenderit tregojnë se fondi limit i lënë në dispozicion për këtë tender është 2,082,400.00 lekë të reja, ose 20 milionë lekë të vjetra. Vetëm shpallja e këtij tenderi në kushtet që ndodhet ekonomia shqiptare duhej të ishte marrë nën hetim, ose minimalja Agjencia e Prokurimeve Publike duhej të kërkonte pezullimin e tij. Por, asnjë masë nuk është marrë deri më tani dhe shumë shpejt 20 milionë lekë do të përfundojnë në xhepat e një nga oligarkëve të tenderëve. Sakaq, kujtojmë se një javë më parë kryeministri Edi Rama iu tërhoqi vëmendje kryebashkiakëve që të kenë kujdes me menaxhimin e fondeve dhe të mos i shpenzojnë ato pa kriter, por të investojnë në zëra që sjellin më shumë të ardhura. Por, Veliaj duket se i del nga fjalë edhe vetë shefit kur vjen fjala për të arreduar zyrën e tij.
Çdo vit ndërrohen suveniret
Nga dokumentet e publikuara në Agjencinë e Prokurimeve Publike evidentohet se blerjen e suvenireve të vjetra Veliaj e paska zakon të përvitshëm dhe në çdo rast shpenzon miliona lekë për to. Vitin që shkoi ai ka mbyllur një tender me vlerë 10 milionë lekë për blerje suveniresh për zyrën e tij dhe ai tender është zhvilluar në shkelje të ligjit. Open Data e ka renditur atë si tender me flamur të kuq, pasi në garë ka marrë pjesë vetëm një kompani; “P I R R O” Sh.p.k . Kjo kompani ka fituar tenderin për blerje suveniresh te Bashkia Tiranë që nga viti 2013 dhe në të shumtën e rasteve pa garë, çka do të thotë se ky projekt i është lënë tashmë plotësisht në duar asaj.
Në çdo vit “P I R R O” Sh.p.k zhvat miliona lekë nga taksapaguesit shqiptar për t’i shitur suvenire, ndërsa në asnjë moment nuk janë marrë masa për rregullat që janë shkelur me këto tendera. Kështu Veliaj dhe kompania “P I R R O” Sh.p.k e kanë pasur rrugën e lirë që të vazhdojnë këtë aferë korruptive, duke e bërë tashmë rutinë të çdo viti. Të gjithë këto të dhëna të lënë që të kuptohet se edhe tenderi i fundit që është akoma në proces në fund do t’i jepet kompanisë “P I R R O” Sh.p.k. Kështu zyra e “Lali Erit” zbukurohet, “P I R R O” Sh.p.k pasurohet dhe qytetarët varfërohen.
Discussion about this post