Teksa vendi është duke u përballur me krizë në të gjitha aspektet, ekonomike, energjetike, e sociale udhëheqësi Edi Rama, duket se po i kalon këto probleme duke “ hipnotizuar” Shqiptarët se do i çojë në orbitë.
Populli i vetëdijshëm për “katrahurën” në të cilën ndodhet vendi, e ka cilësuar qesharake këtë vendim që kryeministri Edi Rama paralajmëroi gjatë fjalës së tij në sesionin e fundit në Kuvend, se Shqipëria vitin e ardhshëm do të lëshojë dy satelitë në orbitë.
Madje nën zë u tha se kjo ishte një shaka e radhës nga kryeministri i cili është mësuar t’i përdorë në të gjitha daljet e tij zyrtare dhe jo zyrtare, por duket se në fakt “Shqipëria do të dërgohet vërtet në orbitë”.
Këtë të mërkurë, ai ka publikuar një video, ku tregon se sateliti i parë, i quajtur “Albania 1”, do të lëshohet në orbitë në muajin mars të vitit 2022. Ndërsa sateliti i dytë, “Albania 2”, pritet të lëshohet në muajin qershor.
