Pas 12 ditësh luftë me flakët, me mjete rrethanore, zjarri ka shënuar viktimën e parë në vendin tonë. Një 60-vjeçar, Andrea Haxhiaj dha frymën e tij të fundit dje duke mbrojtur banesën e tij në Asim Zeneli të Gjirokastrës, ndërsa gruaja e tij ka pësuar dëme të mëdha në trup e fytyrë nga flakët. Por kërcënimi nuk ka mbaruar!
Instituti i Gjeoshkencave, Energjisë, Ujit dhe Mjedisit parashikon që edhe sot, tre qarqet më të rrezikuara për t’u përfshirë nga flakët janë Fieri, Vlora dhe Gjirokastra. Dhe ashtu ka ndodhur, pasi në Lunxhëri të Gjirokastrës është riaktivizuar një tjetër vatër zjarri, e cila po luftohet nga 100 forca ushtarake. FA-të janë mbledhur për të shuar këtë vatër mes fshatrave Qestorat dhe Tranoshishtë, ndërsa nga ajti i ndihmon edhe helikopteri. Gjatë mëgjesit, në orën 03:30 janë shuar flakët në Kalanë e Shën Triadës, shumë pranë antenave të telefonave celularë, duke hequr një rrezik më shumë nga banorët e zonës.
Por problemi më i madh për vendit mbetet zjarri në Karaburun. Sot janë aktivizuar vatra mbi gjirin e Gramës që rrezikojnë edhe Llogaranë, ndërsa situata paraqitet më e qetë në pjesën që dje kishte situatë të rënduar, në zonën e Dukatit të Ri. Por sërish ka rrezik, pasi era gjatë natës ka afruar flakët në bazën e Pashalimanit. Në orët e vona ka pasur një situatë të vështirë pasi flakët e zjarrit janë afruar 30 metër afër bazës, duke rrezikuar jetën e banorëve, megjithatë u bë e mundur neutralizimi i flakëve.
Ndërkohë që vendi po përballet me flakët, sërish politika nuk ka ndenjur larg. Kryetari i Partisë Demokratike, Lulzim Basha ka akuzuar kryeministrin Edi Rama ka shfrytëzuar fondet e Emergjencave Civile, ndërsa vetë udhëton me helikopterin e ushtrisë. Ndërsa nga pala tjetër nuk ka asnjë reagim. Duket që sot “pushim” e ka marrë edhe ministri i Mbojtjes, Niko Peleshi, i cili ende nuk ka dalë për të inspektuar situatën në terren.
