Sulmet e SHBA-së ndaj centraleve bërthamore të Iranit janë një shkelje “flagrante” e së drejtës ndërkombëtare, është shprehur Rusia. Ndërsa reagim të ngjashëm ka pasur edhe Spanja dhe Kina. Kjo e fundit është shprehur se veprimi ushtarak i Donald Trump “shkel seriozisht” kartën e OKB-së.
“Vendimi i papërgjegjshëm për t’i nënshtruar territorit të një shteti sovran sulmeve me raketa dhe bomba, pavarësisht argumenteve që mund të paraqiten, shkel në mënyrë flagrante të drejtën ndërkombëtare, Kartën e Kombeve të Bashkuara dhe rezolutat e Këshillit të Sigurimit të Kombeve të Bashkuara”, tha Ministria e Jashtme e Rusisë në një deklaratë.
“Ne bëjmë thirrje për t’i dhënë fund agresionit dhe për të shtuar përpjekjet për të krijuar kushte për kthimin e situatës në një rrugë politike dhe diplomatike.”
Ministri i Jashtëm i Iranit, Abbas Araghchi, planifikon të udhëtojë për në Moskë nesër për t’u takuar me Presidentin Putin.
Ministri i Jashtëm i Spanjës, Jose Manuel Albares Bueno, tha se vendi i tij është “shumë i shqetësuar” për përshkallëzimin e tensioneve në dritën e sulmeve të SHBA-së ndaj Iranit.
“Nuk është një zgjidhje ushtarake që do të sjellë paqe dhe stabilitet në Lindjen e Mesme, por më tepër diplomaci, dhe për këtë arsye shpresojmë që të gjithë do të kthehen në tryezën e negociatave”, tha Albares, duke folur për transmetuesin RTVE.
Discussion about this post