Portieri polak, Wojciech Szczesny ka vendosur t’i jap fund karrierës së tij si futbollist profesionist dhe vendimin e tij e ka bërë publik sot me anë të një letre shumë emocionuese.
Szczesny kishte ndërprerë kontratën e tij me Juventusin në fund të sezonit të kaluar dhe tani ka njoftuar tërheqjen e tij nga sporti më i bukur në botë.
Ai kaloi tetë vjet te Arsenali, duke përfshirë huazimet me Brentford dhe Romën, përpara se të shkonte te Juve më 2017.
Ai kaloi shtatë vjet në Itali, bëri 84 paraqitje ndërkombëtare me Poloninë dhe tani ka vendosur t’i ‘varë dorëzat’ duke u pensionuar në moshën 34-vjeçare.
“U largova nga Varshava, vendlindja ime në qershor të vitit 2006 për t’iu bashkuar Arsenalit me një ëndërr – për të siguruar jetesën nga futbolli”, nis letrën Szczesny.
“Unë nuk i realizova vetëm ëndrrat e mia, kam ardhur atje ku imagjinata ime nuk do të guxonte të më çonte. Kam luajtur ndeshje në nivelin më të lartë me lojtarët më të mirë në histori pa u ndjerë ndonjëherë inferior”.
“Kam bërë miq për jetën, kam krijuar kujtime të paharrueshme dhe kam takuar njerëz që kanë pasur një ndikim të jashtëzakonshëm në jetën time. Gjithçka që kam dhe gjithçka që jam, ia detyroj lojës së bukur të futbollit…”.
“Prandaj kam vendosur të tërhiqem nga futbolli profesionist”.
“Fundi i një udhëtimi është një kohë për reflektim dhe mirënjohje. Ka shumë njerëz që do të më duhej t’i falënderoja në këtë vend, por do të përpiqem ta bëj këtë personalisht me secilin prej tyre. Por ju – fansave ju detyrohem një falënderim të veçantë që ishit në këtë udhëtim me mua. Për mbështetjen dhe kritikat, për dashurinë dhe urrejtjen, për të qenë pjesa më e bukur dhe më romantike e futbollit. Pa ju, kjo nuk do të kishte kuptim! faleminderit!”.
Discussion about this post